Mańǵystaýda bir kúnde 8 adamnan qaterli isik anyqtaldy
AQTAÝ. KAZINFORM – Mańǵystaýda qaterli isikke shaldyqqandar jyldan-jylǵa kóbeıip barady. Máselen, 2020-jyly 712, 2021-jyly 855, 2022-jyly 1000, 2023-jyly 1043 adam al, bıyl segiz aıdyń ishinde 669 turǵynnan onkologııalyq aýrý anyqtalǵan.
Bıyl tirkelgen naýqastardyń kóbiniń aýrýy alǵashqy satyda. Tek 81 adamnyń qaterli isigi sońǵy satyda anyqtalyp otyr. Mamandar qaterli isikti erte anyqtaýda dárigerge jıi qaralýdyń kómegi kóp ekenin aıtady.
Osyǵan oraı, Mańǵystaý oblystyq onkologııalyq dıspanseri óńir turǵyndaryna arnap «Ashyq esik» kúnin ótkizdi. Tańǵy saǵat toǵyzdan túski birge deıin 44 turǵyn tekserilgen.
- Óz densaýlyǵyna beıjaı qaramaı, tekserilýge kelgenderdiń ishinen 8 adamnan qaterli isik anyqtaldy. Taǵy 3 turǵynnyń densaýlyǵy osy dertke kúdikti dep tirkeldi. Al 28 adamnan basqa aýrý túrleri anyqtalyp, olarǵa dárigerler emdelý joldaryn túsindirdi, - deıdi oblystyq onkologııalyq dıspanserdiń baspasóz hatshysy Saǵyndyq Rzahmetov.
Ashyq esik kúninde 24 adam onkotsıtologııalyq tekserilýge jiberilip, 16 turǵyn ÝZI, 21 adam tómen dozaly KT jáne 17 adam mammografııa apparatyna túsip, tekserilgen. Dıspanserde ashyq esik kúni aı saıyn ótkiziledi.
Buǵan deıin aımaqta qoqys polıgonynyń órtenip jatqanyn jazǵan edik.
