Mańǵystaýda Bozjyra shatqalynda vızıt-ortalyǵynyń qurylysy bastaldy
AQTAÝ. KAZINFORM - Joba boıynsha vızıt-ortalyqta saıahattaýshylarǵa barlyq jaǵdaı qarastyrylady. Munda qonaq kútý ortalyǵy, etno-kafe men glempıngter boı kótermek.
Aımaq turǵyndary jobanyń bastalǵanyna qýanyp, biraýyzdan qoldaý bildirdi.
— Kópten kútken keshenniń bastalǵanyna óte qýanyshtymyz. Mańǵystaý ekonomıkasy endi tek munaıǵa emes, týrızmge de arqa súıeı alady. Keshenniń salynýyna qoldaý bildiremiz. Munda jergilikti kásipkerler de tabys tabady, — deıdi Jańaózen qalasynyń turǵyny Shárip Aqjigitov.
Keshen qurylysy otandyq ınvestordyń jeke qarjysyna júzege asyrylmaq. Joba avtorlarynyń aıtýynsha, vızıt ortalyǵy ekologııalyq talaptarǵa jáne turaqty týrızm prıntsıpterine tolyqtaı saı keledi.
— Vızıt-ortalyq qorshaǵan ortaǵa zııan keltirmeıtindeı etip jobalanǵan. Bıologııalyq tazartý júıeleri, qoqysty suryptap jınaý, kún energııasyn paıdalaný syndy sheshimder kózdelip otyr. Týrısterge barlyq jaǵdaı jasaý — basty maqsatymyz. Sonymen qatar qazaqtyń ulttyq taǵamdary men qundylyqtaryn nasıhattaýǵa da mán beremiz, — deıdi joba jetekshisi Sáýle Jańabaeva.
Jobada 17 glempıng pavılony, 50 qonaqúı bólmesi, jalpy aýmaǵy 450 sharshy metr bolatyn vızıt-ortalyq pen etno-kafe qarastyrylǵan. Týrıstik keshen 2027 jyly paıdalanýǵa berilmek.
Buǵan deıin, Mańǵystaýda Quryq porty qurǵaq júk tasıtyn jańa kememen tolyqqany týraly jazǵan bolatynbyz.