Mańǵystaýda Bozjyra shatqalynda vızıt ortalyǵy salynady
AQTAÝ. KAZINFORM – Memleket basshysy Qasym-Jomart Toqaev Úkimettiń keńeıtilgen otyrysynda jeke ınvestorlardy tarta otyryp, Bozjyra syndy elimizdiń kórikti jerlerin týrızmniń ortalyǵyna aınaldyrýdy tapsyrǵan bolatyn.
Osy oraıda, otandyq ınvestorlar jeke qarajatyna Bozjyrada jylyna 30-40 myń týrısti qabyldaıtyn vızıt ortalyǵyn jáne týrıstik nysandar salýdy kózdep otyr. Jańa jobany Sharyn, Kólsaı, Aıýsaı syndy týrıstik aımaqtaryndaǵy vızıt ortalyqtarynyń qurylysyn júrgizgen álemdik deńgeıde tájirıbesi bar otandyq kompanııa jasaqtaǵan.
Jobanyń tanystyrylymy Jańaózen qalasynda ótti. Qoǵamdyq tyńdaýǵa ardagerler, tabıǵat janashyrlary jáne sarapshylar qatysty. Joba avtorlarynyń aıtýynsha, ortalyq barlyq ekologııalyq talaptardy ári turaqty týrızm prıntsıpterin eskere otyryp salynatyn bolady. Qurylys jumystaryn 2026 jyldyń sońynda aıaqtaý josparlanǵan.
- Ortalyq jınalmaly jeńil konstrýktsııalardan turǵyzylady, olar tereń irgetasty qajet etpeıdi. Ǵımarat mekenniń jer bederine qaraı 400-den 1000 mm bıikte turatyn bolady. Sýmen, elektrmen jabdyqtaý jáne qaldyqtardy óńdeý máseleleri qorshaǵan ortaǵa meılinshe zııan tıgizbeıtindeı etip sheshilgen. Qaldyq sýdy tazartatyn bıotazartý júıeleri, qoqysty suryptap jınaý, kún sáýlesimen qorektendirý qarastyrylǵan, - deıdi joba avtorlary.
Jobanyń maqsaty – tabıǵı landshaft pen mádenı murany saqtaı otyra, saıahattaýshylardy kóshpendi órkenıet álemine jetelep, qazaq halqynyń tarıhyn, salt-dástúrin nasıhattaý.
Týrıstik nysandar Bozjyranyń tómengi jaǵynan da boı kóteredi. Munda etnoaýyl stılinde týrıstik qalashyq, eko-glempıngter men basqa da týrıstik nysandar salynbaq. Joba sátti júzege assa, turaqty 70 jumys orny ashylmaq.
- Bozjyra máselesi aqyry ornynan qozǵaldy-aý. Biraq tek Bozjyra emes, meniń oıymsha Aıraqty, Jyǵylǵan, Tuzbaıyr, Toryshta da qonaq úıler salynýy kerek. Grýzııa, Túrkııa, Ázerbaıjannan qaı jerimiz kem? Biz, árıne qoldaımyz, - dedi Jańaózen qalasynyń turǵyny Orazǵalı Qaspaev.
Joba júzege asyrylsa, jaqyn mańdaǵy eldimekenniń turǵyndaryna da qolaıly bolmaq. Olar aýylsharýashylyǵy ónimderin, qolóner buıymdaryn satýǵa múmkindik alady.
- Endi toqtamaý kerek. Túbinde Mańǵystaýdyń ekonomıkasynyń negizgi bóligi týrızm bolatyny sózsiz. Biz bolashaq jastarymyzdy týrızm, bıotehnologııa, atom energetıkasy, jasandy ıntellekt, tsıfrlandyrý sııaqty mamandyqtarǵa oqytýymyz kerek, - dedi qala turǵyny Sábıt Tókenov.
Qoǵamdyq tyńdaýdyń qorytyndysy boıynsha joba qoldaý tapty.
Buǵan deıin Mańǵystaýda aýa raıyna baılanysty barlyq baǵyttaǵy joldyń jabylǵanyn jazǵan bolatynbyz.