Mańǵystaýda boryshkerlerden 129 mln teńgeden astam qarajat óndirildi

Aqtaý qalasynyń prokýratýrasy kámeletke tolmaǵan balalardyń paıdasyna alımentterdiń ýaqtyly óndirilip alynýyn jáne memleket kirisine qarajattyń qaıtarylýyn qamtamasyz etý baǵytynda jumys júrgizdi.

Jyl basynan qabyldanǵan sharalardyń nátıjesinde balalardyń paıdasyna 82,3 mln teńge kólemindegi alıment bereshegi óteldi.

— Mindettemelerdi oryndaý maqsatynda boryshkerlerdiń múlkine, onyń ishinde 1 páterge, 2 jer ýchaskesine jáne 2 avtokólik quralyna óndirip alý sharalary qoldanyldy.

Balalardy asyraý jónindegi mindetterdi oryndaýdan jaltarý jáne kiristerdi jasyrý faktileri boıynsha 41 boryshker ákimshilik jaýaptylyqqa tartyldy, 15 tulǵaǵa qatysty sotqa deıingi tergep-tekserý bastaldy.

Sonymen qatar prokýrorlyq qadaǵalaý aktileri negizinde memleket kirisine 46,8 mln teńge óndirildi, — delingen habarlamada.

Alıment boıynsha bereshegi bar azamattardy jumyspen qamtý maqsatynda bos jumys oryndary jármeńkesi uıymdastyryldy. Onyń qorytyndysy boıynsha 33 adam turaqty jumysqa ornalasýǵa nıet bildirse, 18 adam jumys izdeýshi retinde tirkeldi.

Aıta ketelik Túrkistan oblysynda 50 boryshker alıment tólemegeni úshin ákimshilik jaýapqa tartylǵan edi.