Mańǵystaýda bilim salasyndaǵy sapany qamtamasyz etý departamentine basshy taǵaıyndaldy
ASTANA. KAZINFORM — Endi Svetlana Dúmbaıqyzy Mańǵystaý oblysynyń bilim salasyndaǵy sapany qamtamasyz etý departamentin basqarady.
— Oqý-aǵartý mınıstri Juldyz Súleımenovanyń buıryǵymen Svetlana Dúmbaıqyzy QR Oqý-aǵartý mınıstrligi Bilim salasyndaǵy sapany qamtamasyz etý komıtetiniń Mańǵystaý oblysynyń bilim salasyndaǵy sapany qamtamasyz etý departamenti basshysy bolyp taǵaıyndaldy, — delingen mınıstrlik habarlamasynda.
Svetlana Dúmbaıqyzy 1967 jyly Mańǵystaý oblysy Qaraqııa aýdany Jetibaı aýylynda dúnıege kelgen. 1988 jyly S. Kırov atyndaǵy Qazaq memlekettik ýnıversıtetin «Fızıka» mamandyǵy boıynsha bitirgen.
Eńbek jolyn 1988 jyly Qaraqııa aýdanyndaǵy № 8 orta mektepte fızıka pániniń muǵalimi bolyp bastady. Ár jyldary fızıka pániniń muǵalimi, dırektordyń tárbıe jáne oqý jumysy jónindegi orynbasary, Aqtaý qalasyndaǵy Ekonomıkalyq lıtseıdiń dırektory qyzmetterin atqardy.
2014–2021 jyldary Aqtaý qalalyq bilim bóliminiń basshysy boldy. 2021–2022 jyldary Mańǵystaý oblysynyń bilim basqarmasyn basqardy.
2023–2026 jyldary Mańǵystaý oblysy boıynsha «Aýyl» partııasynyń óńirlik qurylymdarynda jumys istedi.
2026 jylǵy mamyrdan bastap QR Oqý-aǵartý mınıstrligi Bilim salasyndaǵy sapany qamtamasyz etý komıtetiniń Mańǵystaý oblysynyń bilim salasyndaǵy sapany qamtamasyz etý departamenti basshysy bolyp taǵaıyndaldy.
Jalpy eńbek ótili 36 jyldan asady. «Y. Altynsarın» tósbelgisimen marapattalǵan.
Budan buryn Ádil Qusmanov Strategııalyq josparlaý jáne reformalar agenttigi tóraǵasynyń orynbasary bolǵanyn jazdyq.
