Mańǵystaýda bilim salasynda 800-den astam adam jaýapkershilikke tartyldy

AQTAÝ. KAZINFORM – Aımaqta prokýrorlar bilim berý salasyna tolyq tekserý júrgizgen. Nátıjesinde kóptegen zańbuzýshylyq pen bilim sapasyn tómendetýge áser etetin faktorlar anyqtaldy.

Mańǵystaý oblystyq prokýratýrasynyń basqarma bastyǵy Mergen Meńdigalıevtiń málimetinshe, bıýdjet qarjysyn jymqyrý, alaıaqtyq, qyzmettik ókilettilikti teris paıdalaný derekterimen 20-dan astam qylmystyq is qozǵalǵan.

- Tekserý nátıjesinde 300-den astam tulǵa tártiptik jazaǵa, 500-den astam laýazymdy tulǵa ákimshilik jaýaptylyqqa tartyldy. Sondaı-aq, 7 pedagogtyń jalǵan dıplommen jumys istep júrgenin anyqtadyq. Jalpy sońǵy 3 jylda oblysta jalǵan dıplomǵa qatysty 100-den astam derek tirkeldi. Barlyǵy boıynsha qylmystyq is qozǵalyp, kináli tulǵalar jaýapqa tartyldy, - deıdi Mergen Meńdigalıev.

Prokýrorlar budan bylaı jalǵan dıplomdy jumysqa kirmes buryn anyqtaý úshin quzyrly memlekettik organǵa ortalyqtandyrylǵan júıe qurýdy usynǵan.

- Jalǵan dıplomdy paıdalaný faktisi arqyly balalarǵa bilim berý eń ótkir másele bolyp tur. Sondyqtan pedagogtyń dıplomy jumysqa ornalasqanǵa deıin ortalyqtandyrylǵan júıe arqyly tekserilýi qajet. Qazir ýákiletti organ sol júıeni qarastyryp jatyr. Aldaǵy ýaqytta iske qosady, - deıdi Mańǵystaý oblystyq prokýratýrasynyń basqarma bastyǵy Mergen Meńdigalıev.

Buǵan deıin sınoptıkter Mańǵystaýda jazda aptap ystyq bolatynyn habarlaǵan edi.