Mańǵystaýda bıyl jatyr moıny obyrynan 10 áıel kóz jumdy
AQTAÝ. KAZINFORM – Qazaqstan boıynsha atalǵan dertten kúnine 2 áıel qaıtys bolady. Bul týraly Mańǵystaý oblystyq Densaýlyq saqtaý basqarmasy basshysynyń orynbasary Bıbizada Dúısenbaeva málimdedi.
«Qazaqstannyń kórsetkishi óte joǵary. Biz jylyna 600 áıeldi joǵaltamyz. Kúnine eki áıel osy qaýipti aýrýdan, adam papılloma vırýsynan qaıtys bolady. Al vaktsınatsııa arqyly, biz de sol órkenıetti elder sııaqty aýrýdyń aldyn alýǵa ata-analardy, barlyq osy bizdiń urpaq órbitý jasyndaǵy áıelderdi osyǵan shaqyramyz», - deıdi basqarma ókili.
Osyǵan oraı, mamandar bilim salasynyń, din isteri men jastar saıasaty basqarmalarynyń ókilderine túsindirý jumystaryn júrgizdi. Mamandardyń aıtýynsha, qaterli dertpen kúresýdiń birden bir joly – ekpe saldyrý. Adam popılloma vırýsyna qarsy vaktsına 11 jastaǵy qyzdarǵa salynady. Dárigerler vaktsınanyń adam aǵzasyna zııany joǵyn aıtady. Ekpe egý jumystary 30 qyrkúıekten bastap, ata-analardyń kelisimimen júrgizilmek.
Buǵan deıin Aqtaýda 36 gektarǵa jýyq jer májbúrli túrde memleketke qaıtarylǵany týraly jazǵan bolatynbyz.
