Mańǵystaýda bıyl 130-ǵa jýyq ınternet-alaıaqtyq qylmys tirkeldi
AQTAÝ. KAZINFORM – Osy alaıaqtyq qylmystardyń búginde 76sy ashylyp, sotqa joldanǵan. Bul týraly Mańǵystaý oblystyq polıtsııa departamenti bastyǵynyń orynbasary Іlııas Jumaǵulov málimdedi.
Onyń aıtýynsha, qazirgi tańda turǵyndardy aldaý úshin jıi qoldanylatyn tásilder – «Qazposhtadan sálemdeme keldi», «SIM-kartany jańartý kerek» nemese «Medıtsınalyq tirkeýden ótińiz» degen habarlamalar jiberip nemese qońyraý shalý. Sol arqyly alaıaqtar qupııa kodty surap, jábirlenýshiniń atyna nesıe rásimdeıdi.
– Alaıaqtar ózderin bank nemese polıtsııa qyzmetkeri retinde tanystyryp, nesıeni «qaýipsiz shotqa» aýdarýdy suraıdy. Sonymen qatar, turǵyndar aqshasyn eki ese kóbeıtemiz dep túrli ınternet jobalarǵa qatysyp, aldanyp qalyp jatady. Kolesa, OLX syndy platformalarda jalǵan jarnamalar arqyly aldyn ala tólem jasap, jeke derekterin berip, aldaný jaǵdaılary jıi kezdesedi. Budan bólek, WhatsApp, Telegram arqyly tanysynyń atynan qaryz surap, senimge kirip aldaý da beleń alyp tur, - deıdi Іlııas Jumaǵulov.
Oblystyq polıtsııa departamenti bastyǵynyń orynbasary Іlııas Jumaǵulov ınternet-alaıaqtyqtan qorǵaný joldaryn atady.
– Jeke derekterińizdi eshkimge bermeńiz. Bank kartasynyń nómeri, PIN-kod, SMS arqyly kelgen qupııa sózder - bul sizdiń qarjylyq qaýipsizdigińiz. Kúmándi siltemeler men qosymshalardan aýlaq bolyńyz. Belgisiz saıttarǵa bank derekterin engizbeńiz. Kúdikti qońyraýlarǵa senbeńiz. Bank, polıtsııa nemese basqa organdar sizge qońyraý shalyp, shotyńyzdaǵy qarajat týraly suramaıdy. Aldyn ala tólem jasamańyz. Internet arqyly taýar satyp alǵanda, satýshynyń senimdi ekenine kóz jetkizińiz. Kúmándi qarjylyq usynystardan bas tartyńyz! Alaıaqtardyń qurbany bolmańyz, - deıdi Іlııas Jumaǵulov.
Buǵan deıin, Mańǵystaýdyń Qaraqııa aýdanynda dronǵa uqsas zat tabylǵany týraly jazǵan boatynbyz.