Mańǵystaýdyń Beıneý aýdanynda 11 bala birdeı dıagnozben aýrýhanaǵa jetkizildi

AQTAÝ. KAZINFORM — Oqıǵa keshki mezgilde saǵat 19:05 — 23:00 aralyǵynda bolǵan. Beıneý aýdandyq ortalyq aýrýhanasynyń qabyldaý bólimine 9-12 jas aralyǵyndaǵy 11 bala jedel-járdemmen jetkizilgen. Olardyń barlyǵynda qusý men álsizdik bolǵan. 

Beıneý aýdany ákimi baspasóz qyzmetiniń habarlaýynsha, balalar 2,3 jáne 5-synyp oqýshylary. Barlyǵy da dárigerlerdiń tekserýinen keıin úılerine jiberilgen.

— Dárigerler qarap, balalardy úılerine qaıtardy. Aýrýhanaǵa jatqyzylǵandar joq. Qazirgi ýaqytta oqýshylardyń densaýlyǵy birqalypty, ambýlatorlyq baqylaýda, — delingen habarlamada. 

Al, Beıneý aýdandyq sanıtarııalyq — epıdemıologııalyq baqylaý basqarmasynyń mamandary osy oqıǵadan keıin, jedel tergep-tekserý júrgizip, azyq-túlikterden synamalar alǵan. Oqýshylardyń neden aýyrǵanyn anyqtaý úshin, sanıtarııalyq profılaktıkalyq is-sharalar júrgizilip jatyr.

Buǵan deıin, Mańǵystaýda Qyzylsaı aýylynda balabaqshada balalar astan ýlanǵan edi.