Alǵash ret kóktaıǵaq saldarynan bolǵan adam ólimi úshin jol qyzmetkeri jaýapqa tartyldy
AQTAÝ. KAZINFORM — Mańǵystaý oblysynyń Beıneý aýdandyq soty bes adamnyń ómirin qıǵan jol-kólik oqıǵasy týraly qylmystyq is boıynsha úkim shyǵardy.
Qaıǵyly oqıǵa 2026 jylǵy 16 qańtarda respýblıkalyq mańyzy bar «Dossor — Qulsary — Beıneý — Saı-Ótes — Shetpe — Jetibaı — Aqtaý» avtojolynda boldy. Kóktaıǵaqtyń kesirinen Yutong jolaýshylar avtobýsy joldan shyǵyp ketip, aýdarylǵan. Apat saldarynan bes adam qaza taýyp, taǵy 14 adam túrli jaraqat aldy.
Tergep-tekserý amaldaryn Bas kólik prokýratýrasynyń arnaıy prokýrorlary júrgizdi. Olar qaıǵyly oqıǵaǵa avtojoldy qysqy kezeńde tıisinshe kútip ustamaý sebep bolǵanyn anyqtady. Tergeý jaýapty tulǵalardyń áreketsizdigi men oryn alǵan aýyr saldar arasyndaǵy tikeleı sebep-saldaryn dáleldedi.
Bul — Qazaqstannyń quqyq qoldaný tájirıbesindegi, avtomobıl jolyn qysta tıisinshe kútip ustamaý adamdardyń ólimi úshin qylmystyq jaýaptylyqqa tartýǵa negiz bolǵan tuńǵysh qylmystyq is.
Sot úkimimen «KAJServıs» JShS Mańǵystaý oblystyq fılıalynyń № 57 jol paıdalaný bólimshesiniń (JPB-57) bastyǵy QR QK-niń 353-baby 4-bóligi boıynsha kináli dep tanyldy. Oǵan 2 jyl 6 aı merzimge shartty túrde bas bostandyǵynan aıyrý jazasy taǵaıyndaldy.
Úkim zańdy kúshine engen joq.
Aıta ketelik SQO-da júkti áıeldiń jol ústinde qaıtys bolýyna baılanysty qylmystyq is qozǵaldy.
