Mańǵystaýda Beket ata jerasty meshitine barýǵa jolǵa shyqqan adamdar qutqaryldy
ASTANA. KAZINFORM – QR Tótenshe jaǵdaılar mınıstrliginiń baspasóz qyzmeti Mańǵystaý oblysynda 7 adamnyń qutqarylǵanyn habarlady.
Baspasóz qyzmetiniń málimetterine qaraǵanda, keshe Qaraqııa aýdany aýmaǵynda, Jańaózen qalasynan 137 shaqyrym jerde ornalasqan Beket-Ata jerasty meshiti mańynda tórt adamdy izdestirý maqsatynda izdestirý-qutqarý jumystary uıymdastyryldy.
Belgili bolǵandaı, azamattar avtokólikpen Beket-Ata jerasty meshitine jolǵa shyqqan. Jolda olardyń kóligi batpaqty massaǵa batyp qalyp, saldarynan ózdiginen qozǵalysty jalǵastyra almaı, baılanysqa shyǵa almaǵan.
Adamdardyń joǵalǵany týraly týystary «112» pýltine habar bergen.
- Búgin júrgizilgen is-sharalar nátıjesinde barlyq tórt adam «Qazavıaqutqarý» TJM tikushaǵynyń kómegimen áýeden Beket-Ata jerasty meshitinen shamamen 30 shaqyrym qashyqtyqta anyqtalyp, aman-esen qutqaryldy. Sonymen qatar, júrgizilgen jumystar barysynda avtokólikpen jolǵa shyǵyp, Beket-Ata jerasty meshitinen 20 shaqyrym jerde batpaqqa batyp qalǵan taǵy úsh adam evakýatsııalandy, - delingen habarlamada.
Barlyq evakýatsııalanǵan azamattar tikushaqpen Beket-Ata mańyndaǵy qoný alańyna jetkizildi. Olarǵa medıtsınalyq kómek qajet bolǵan joq.
Osyǵan deıin Sátbaevta órtten er adam men tórt bala qutqarylǵany týraly jazdyq.
