Mańǵystaýda barlyq baǵyttar boıynsha joldar jabyldy
AQTAÝ. KAZINFORM – Aımaqta keshe túnnen beri tolassyz qar jaýyp tur. Osyǵan baılanysty «Dossor – Qulsary – Beıneý - Saı-Ótes – Shetpe – Jetibaı - Aqtaý» joldary jabyldy.
Sonymen qatar, «Jetibaı–Jańaózen–Ózbekstan shekarasy», Jetibaı aýyly - Jańaózen qalasy, Aqtaý - Quryq» baǵytynda da jol qozǵalysy toqtatyldy.
Oblys aýmaǵynda keı jerlerde tolasyz qar jaýyp, jel kúsheıip, kóktaıǵaq bolatynyn Qazgıdromed mamandary aldyn ala boljaǵan bolatyn.
Sınoptıkterdiń málimetinshe, mundaı aýa raıy aldaǵy kúnderi de jalǵasady.
- Qazgıdromettiń boljamy boıynsha belsendi ońtústik tsıklonymen baılanysty 21-28 aqpan aralyǵynda Mańǵystaý óńiriniń basym bóliginde kún jaýyn-shashyndy (jańbyr, qar) bolady. Qar jáne qar aralas jańbyr jaýýy, jel kúsheıýi, tuman túsýi, kóktaıǵaq bolýy yqtımal. Aýa temperatýrasy túnde 0-8 gradýstan -5-10 gradýsqa deıin tómendeıdi. Al, kúndiz -3+2 bolady, - deıdi «Qazgıdromet» RMK uzaq merzimdi aýa raıy boljamdary basqarmasy departamentiniń jetekshi ınjeneri Aqnur Toqtarova.
Al, Aqtaýda joldarǵa tuz aralas qum sebilip jatyr.
- Túngi kezekshilikte avtomobıl jolyna 50 tonna qum-tuz aralas qospasy sebilgen. Kúndiz jumystar qaıtadan jalǵasyp, joldyń qaýipti jerlerine 15 tonna tuz aralas qum sebilýde. Kommýnaldyq mekemelerden 400-den astam jumysshy jumyldyryldy, - dep habarlaıdy Aqtaý qalasy ákimdiginiń baspasóz qyzmeti.
Buǵan deıin, mańǵystaýlyq qutqarýshylar Ázerbaıjan TJ mınıstriniń buıryǵymen marapattalǵany týraly jazǵan bolatynbyz.
