Mańǵystaýda BalQaimaq taǵam festıvali ótti
Aqtaý qalasy irgesindegi Tetysblu tematıkalyq parki aýmaǵynda ótken taǵam festıvaline qalanyń 20-dan astam úzdik meıramhanasy men kafeleri qatysty, dep habarlaıdy Kazinform agenttigi.
Shara Mańǵystaý oblysynda týrıstik maýsymdy uzartý maqsatynda uıymdastyrylǵan.
Sonymen qatar festıval elimizdiń qonaqjaılyǵyn kórsetip, óńirdiń gastronomııalyq mádenıetimen tanystyrdy.
Sharaǵa 2400- den astam adam men tanymal ónerpazdar qatysty.
Bul kúni TetysBlu saıabaǵyna kirý tegin boldy. Taqyryptyq saıabaqta 13 attraktsıon tegin qyzmet kórsetip, balalarǵa arnalǵan kontserttik baǵdarlama uıymdastyryldy.
Sondaı-aq, shara barysynda sút ónimderin daıarlaý tásilderi boıynsha tegin sheberlik synyptary uıymdastyryldy.
- Maǵan kontserttik baǵdarlama qatty unady. Ánshiler erekshe áser qaldyrdy. Sondaı aq, qurt daıyndaýdy da úırendim. Aldaǵy ýaqytta óńirimizde osyndaı is- sharalar kóbeıse eken, – deıdi Aqtaý qalasynyń turǵyny Madına Ómirzaq.