Mańǵystaýda balyqtan ýlanǵan tórt adam jansaqtaý bólimine tústi
AQTAÝ. KAZINFORM — Mańǵystaý oblysynda úı jaǵdaıynda ystalǵan balyqty tutynǵan úsh eresek adam men bala aýyr halde aýrýhanaǵa tústi. Naýqastardyń barlyǵyna botýlızm dıagnozyna kúdik qoıylyp, jasandy ókpe jeldetý apparatyna qosylǵan.
Mańǵystaý oblystyq densaýlyq saqtaý basqarmasynyń bas shtattan tys epıdemıology Maral Qadyrdyń málimetinshe, úsh eresek adam Munaıly aýdanynan oblystyq kópbeıindi aýrýhanaǵa jetkizilgen. Sondaı-aq 9 jas 10 aılyq bala oblystyq balalar kópbeıindi aýrýhanasynyń ınfektsııalyq bólimine jatqyzylǵan.
Aldyn ala málimet boıynsha, ýlanýǵa úı jaǵdaıynda daıyndalǵan sýyq ystalǵan balyq sebep bolýy múmkin. Mamandardyń aıtýynsha, balyq uzaq ýaqyt boıy tońazytqyshta saqtalǵan. Zardap shekkenderdiń barlyǵy ony 17 qyrkúıek kúni keshki saǵat 20:00–21:00 aralyǵynda otbasylyq jıyn kezinde tutynǵan.
Aýrýdyń alǵashqy belgileri 18 qyrkúıek keshke baıqalǵan. Naýqastar 19 qyrkúıekte medıtsınalyq kómekke júgingen.
— Úı jaǵdaıynda naýqastardyń birneshe ret júregi aınyp, qusýy baıqalǵan. Aýrýhanaǵa túskennen keıin olardyń jaǵdaıy aýyr dep baǵalandy. Negizgi belgileriniń qatarynda álsizdik, bas aınalý, jutynýdyń jáne kórýdiń buzylýy, tamaqtyń qurǵaýy, kózdiń buldyraýy men qosarlanyp kórýi, sondaı-aq sana buzylystary bar, — deıdi Maral Qadyr.
Qazir barlyq naýqas aýyr jaǵdaıda jatyr. Olarǵa qarqyndy dezıntoksıkatsııalyq jáne sımptomatıkalyq em júrgizilip, arnaıy botýlızmge qarsy sarysý engizilgen.Densaýlyq saqtaý mamandary turǵyndardy azyq-túlik qaýipsizdigi talaptaryn saqtaýǵa shaqyrady.
Ásirese tez buzylatyn ónimderdi úı jaǵdaıynda daıyndaý men saqtaý kezinde sanıtarııalyq talaptardy qatań saqtaýǵa keńes berdi.
Buǵan deıin, Qandyaǵashtaǵy jappaı ýlaný deregi boıynsha qylmystyq is qysqartylǵan bolatyn.
