Mańǵystaýda balyqtan ýlanǵan 9 jastaǵy bala kóz jumdy
AQTAÝ. KAZINFORM — Mańǵystaýda balyqtan ýlanyp, jansaqtaý bólimine túsken 9 jastaǵy bala kóz jumdy.
Balanyń qaıtys bolǵanyn týystary rastady. Olardyń aıtýynsha, bala keshe, 6 qazanda jansaqtaý bóliminde kóz jumdy.
Týystary balanyń ólimi buǵan deıin ózi tutynǵan úı jaǵdaıynda daıyndalǵan balyqtan ýlanýymen baılanysty bolýy múmkin dep esepteıdi.
Balanyń aýrýhanaǵa túsken ákesiniń jaǵdaıy turaqtanǵan. Otbasynyń taǵy eki eresek múshesi oblystyq kópbeıindi aýrýhanada em qabyldap jatyr.
Medıtsınalyq mekeme jaǵdaıǵa qatysty ázirge túsinikteme bergen joq.
Buǵan deıin Mańǵystaý oblysynyń Munaıly aýdanynda úı jaǵdaıynda ystalǵan balyqty tutynǵan turǵyndardyń aýrýhanaǵa túskenin habarlaǵan bolatynbyz. Úsh eresek adam men 9 jastaǵy balada aýyr botýlızm belgileri anyqtaldy. Olarǵa botýlızmge qarsy sarysý engizildi.
Keıin balyqtan ýlanyp, aýrýhanaǵa túsken 9 jastaǵy balanyń týystary kómek suraǵan edi.
