Balama bergenshe bás tigeıin: Aqtaýda alıment boryshkeri 45 mln teńgesin býkmekerge jumsaǵan

AQTAÝ. KAZINFORM — Prokýrorlar alıment tólemeı júrgen 13 boryshkerdiń 73,3 mln teńge kiristi jasyrǵanyn anyqtady.

Atap aıtqanda, alıment boıynsha boryshker A. 2023-2024 jyldary býkmekerlik keńsedegi jeke shotyna bás tigý úshin 45,7 mln teńge salǵan.

Atqarýshylyq qujat boıynsha 2,5 mln teńge bereshegi bolsa da, ol syrt kózge óz mindetin oryndap jatqanyn kórsetý maqsatynda 85 myń teńge jalaqyǵa jumysqa formaldy ǵana ornalasqan. 

Atalǵan fakt boıynsha prokýratýra QR QK-niń 139-babymen tergeý bastady.

Jyl basynan beri prokýrorlardyń bastamasymen 21 boryshkerge qatysty tergeý bastalǵan, 13 is boıynsha sot úkimi shyqty, qalǵandary tergelýde.

Prokýratýra alıment tólemeýdiń quqyqtyq saldary bar ekenin qatań eskertedi.