Mańǵystaýda balalarǵa arnalǵan dinı pansıonattardyń qyzmetti toqtatyldy

AQTAÝ. KAZINFORM – Mańǵystaý oblystyq prokýratýrasy balalar pansıonattary túrindegi qaıyrymdylyq mekemelerin tekserý barysynda, balalarǵa zańsyz dinı ilim bergen 5 pansıonatty anyqtady. Onyń ekeýi Munaıly aýdanynda, qalǵandary Túpqaraǵan aýdany, Jańaózen men Aqtaý qalasynda ornalasqan. Pansıonattar qaıyrymdylyq mekemeleri retinde ashylyp, balalarǵa dinı ilim bergen. 

– Dinı ádebıetterdi paıdalanǵan, dinı maǵlumattardy úıretken. Ol jerlerden dinı kitaptar anyqtalyp, tárkilendi. Pansıonattarda 50-ge jýyq bala tárbıelengeni belgili boldy. Osy jaǵdaıǵa baılanysty balalardyń ata-analary Ákimshilik quqyq buzýshylyq Kodeksiniń 127-babymen jaýaptylyqqa tartyldy, - deıdi oblys prokýrorynyń aǵa kómekshisi Baǵdat Karlenov. 

Pansıonattarda sanıtarlyq, órt qaýipsizdigi, eńbek zańnamalary da saqtalmaǵan. Osylaısha balalardyń bilim, tárbıe jáne ýaqtyly medıtsınalyq kómek alý quqyqtary men bostandyqtary aıtarlyqtaı buzylǵan. Tekserýler nátıjesinde pansıonat basshylaryna 11 ákimshilik hattama toltyrylyp, 1 mıllıon 300 myń teńge kóleminde aıyppul salyndy. 

Prokýrorlardyń talap-aryzdary boıynsha sot sheshimimen pansıonattardyń barlyǵy da jabyldy.