Mańǵystaýda balalardyń jappaı ýlaný faktisi qalaı tergelip jatyr

ASTANA. KAZINFORM — Іshki ister mınıstrligi Mańǵystaý oblysynda oqýshylardyń ýlaný faktisin tergeý barysy qalaı júrip jatqanyn aıtty. 

Mańǵystaý oblysynyń polıtsııa departamenti Munaıly aýdanynda oqýshylardyń jappaı ýlaný faktisi boıynsha qylmystyq isti tergeýdi jalǵastyryp jatyr.

Qylmystyq is sheńberinde tergeýshiler mektep, ashana jáne jetkizýshi kompanııa qyzmetkerleriniń qatysýymen barlyq qajetti tergeý áreketterin júrgizýde.

Mektep ashanasyna azyq-túlik satyp alynǵan obektiler anyqtaldy, jetkizý sharttary men úlgileri alyndy, tıisti zertteýler taǵaıyndaldy.

«Tergeý sharalary men zertteý nátıjesi boıynsha kináli adamdardyń is-áreketine quqyqtyq baǵa beriledi. Tergeý barysy ІІM basshylyǵynyń baqylaýynda. Jumys jalǵasyp jatyr» deıdi vedomstvodan. 

Eske sala keteıik, 7 qyrkúıek kúni Munaıly aýdanynyń emhanasyna astan ýlanǵan 141 bala kómekke júgingen bolatyn.

Ýlanǵan oqýshylardyń ishinde 67 bala aýrýhanaǵa jatqyzyldy.

Keıinnen as ishken soń jaǵdaıy nasharlaǵan oqýshylardyń sany 222-ge jetti.

Búgin bul isti Úkimet óz baqylaýyna alyp, tez arada búkil mektepterdiń ashanasy tekseriletinin málimdedi.

Al atalǵan mekteptiń ashanasy mór basylyp, jabyldy.