Mańǵystaýda balalardyń tamaqtan ýlanýyna jol bergender jazalanady
ASTANA. KAZINFORM — Mańǵystaýda balalardyń tamaqtan ýlanýyna jol bergender jazaǵa tartylady. Bul týraly Úkimet otyrysynan keıingi brıfıngte Oqý-aǵartý mınıstri Ǵanı Beısembaev aıtty.
«Buǵan deıin búkil bilim berý uıymdarynda tamaqtandyrýdy uıymdastyrýǵa qatysty másele zańnamalyq baza arqyly kúsheıtilgen bolatyn. Jergilikti atqarýshy organdar osy qabyldanǵan erejeni qatań ustanýǵa tıis. Máselen, árbir bilim berý uıymynda bar brakerajdyq komıssııa buryndary aptasyna bir ret tekserý júrgizse, endi atalǵan komıssııa tekserýdi kúndelikti júrgize alady. Óńirlik monıtorıng toptary da kez kelgen ýaqytta tekserý júrgizedi», — dedi mınıstr.
Sonymen qatar ol jergilikti atqarýshy organdar da, balalardy tamaqtandyrýmen aınalysatyn kásipkerler de zańnyń talaptaryn qatań ustanýy jáne ony buzbaýy kerektigin basa aıtty.
Sonymen qatar mınıstr balalardyń tamaqtan ýlanýyna baılanysty kimderdiń jazalanatyndyǵyna qatysty suraqqa sydyrtpa jaýap berdi.
«Atalǵan monıtorıng jumystary júrgizilgennen keıin mindetti túrde shara qabyldanyp, ony ózderińiz estısizder. Bul oqıǵaǵa qatystylardyń bárine zańdy tártiptik jaza men shara qoldanylady», — dedi Ǵanı Beısembaev.
Eske salaıyq, Mańǵystaýdyń Munaıly aýdanynda bir mekteptiń 500-ge jýyq oqýshysy astan ýlanyp qaldy.
Olardyń barlyǵy mektep ashanasynda tegin ystyq tamaq ishkennen keıin aýyrǵan.
Osy oqıǵadan keıin búkil el boıynsha mektepterdiń ashanasy tekseriletin boldy.
Sondaı-aq Úkimet otyrysynan keıingi brıfıngte Densaýlyq saqtaý mınıstri Aqmaral Álnazarova 387 bala ambýlatorlyq em alyp jatsa, 75 bala áli de aýrýhanada ekenin aıtqan edi.
