Mańǵystaýda balabaqshada bala pyshaq jaraqatyn aldy: dırektor qyzmetinen bosatyldy
ASTANA. KAZINFORM — Mańǵystaý oblysynyń Jetibaı aýylyndaǵy balabaqshada tárbıelenýshi keńse pyshaǵynan jaraqat aldy. Oqıǵa 20 sáýirde bolǵan, alaıda ol týraly beınejazba áleýmettik jelide jarııalanǵan soń habar keńinen taraǵan.
Mańǵystaý oblystyq bilim basqarmasynyń málimetinshe, tynyǵý ýaqytynda «Jaýqazyn» balabaqshasy dırektorynyń uly «Kógershin» tobyna kirgen.
Vedomstvo deregine sáıkes, bala uıyqtap jatqan balalardy oıatqan. Sonyń saldarynan tárbıelenýshilerdiń biri keńse pyshaǵynan jaraqat alǵan.
Oqıǵa bolǵan sátte top bólmesinde tárbıeshi men onyń kómekshisi bolmaǵan.
Beınejazba jarııalanǵannan keıin bilim basqarmasy tekserý júrgizdi. Tekserý barysynda beınekadrdaǵy jaǵdaıdyń ras ekeni rastaldy.
Top tárbıeshisinen túsinikteme alynyp, anyqtalǵan zańbuzýshylyqtardy joıý jóninde nusqama berildi.
Vedomstvo málimetinshe, aýdandyq bilim bóliminiń 2026 jylǵy 13 mamyrdaǵy buıryǵy negizinde balabaqsha dırektorymen eńbek sharty buzylǵan.
Sonymen qatar mektepke deıingi uıym dırektory men top tárbıeshisi ákimshilik jaýapkershilikke tartyldy. Olarǵa aıyppul salyndy.
Osyǵan deıin Qyzylordadaǵy balabaqshada balalardy julqylaǵan tárbıeshiniń ústinen qylmystyq is qozǵalǵany týraly jazdyq.
