Mańǵystaýda balabaqsha qyzmetkeri 1 jarym jastaǵy balanyń qolyn shyǵaryp jiberdi

AQTAÝ. KAZINFORM — Oqıǵa Mańǵystaý oblysy Munaıly aýdanyndaǵy jeke balabaqshalardyń birinde bolǵan.

Zardap shekken búldirshinniń anasy Venera Janserikovanyń aıtýynsha, qyzy qoly aýyrsa da, apaıynan qorqyp jylamaǵan. 

— Oqıǵa qańtardyń 17-si kúni boldy. Men jumysta edim. Joldasym qyzymdy balabaqshadan alǵan boıda beıneqońyraý shalyp, qoly shyǵyp ketken sııaqty dedi. Men birden aýrýhanaǵa apar dep, ózim de jedel sonda bardym. Qyzymnyń qoly shyqqan. Súıegi taıyp ketken deıdi ǵoı, dáriger ornyna salyp, tańyp berdi. 7 jasqa deıin oınamaly bolatynyn aıtty, — deıdi ol. 

Alaıda, bul jaǵdaıdy balanyń tárbıeshisi de, bala kútýshi de moıyndamaı, eshteńe baıqamaǵandaryn aıtqan. Sondyqtan ata-ana sol kúngi beınejazbany kórsetýdi talap etken.

Beınejazbada jerde otyrǵan qyzyna bala kútýshiniń umtylyp, qolynan julqyp, basqa jerge yǵystyrǵanyn kórgen. Ekinshi ret uıqydan turǵan kezde kıindirip jatyp, qolynan tartyp qalǵan. Sol kezde búldirshinniń qoly shyǵyp ketken kórinedi.

— Meniń qyzymdy otyrǵan jerinen qolynan tartqan, sol kezde shyntaq súıegi taıyp ketken. Biraq jylamaıdy sebebi apaıynan qorqatyn sııaqty. Sol jerde 10-15 mınýt otyrady, qoly aýyrǵasyn. Qyzym uıqydan birinshi oıandy, apaıy kele jatsa, qaıta jata qalady vıdeoda, demek qorqatyn bolǵasyn jylamaǵan bolyp tur, — deıdi ata-ana.

Venera Janserikova bir kúnniń beınejazbasyn tolyq kórip, jaǵa ustatarlyq jáıttarǵa kýá bolǵan. Aıtýynsha, tárbıeshi men bala kútýshi toptaǵy 15 balany kún uzaǵyna televızordyń aldynda ustap, barlyǵyn bir qasyqpen tamaqtap, sháı-sý bermeı shólden qatyrǵan. 

— Bala kútýshi bir tárelke sorpaǵa nandy malǵa týraǵandaı ýatyp salyp jatyr. Qolynda qolǵap joq. Balalardy obedke otyrǵyzady. 3 stol jaıylǵan. Birinshi ústelde 6 bala 6 qasyq, ekinshi stolda janaǵy nan týralǵan bir tarelka sorpa 3-4 bala otyr. Úshinshi ústelde de solaı. Ekinshi tamaq pen kompot berilmedi. Poldnık atymen joq. Keshki asqa eki stol jaıdy, bireýinde eki tarelka bir qasyq, ekinshi stolda eki tarelkada jarma botqasy bir qasyq. Sýsyn joq eshqandaı. Sol keshki as eken. 15 bala eki stolǵa bólinip otyrady. Tárbıeshi men nıanıa eki stolda bir qasyqpen kezek-kezek botqany balalarǵa jegizedi. Vıdeoda túgel anyq kórinip tur. Meniń qyzym qoly salbyrap tursa da, tamaq jeý úshin saý qolymen oryndyǵyn tasyp júr. Bul joly da eshqandaı sýsyn bermedi. Balalar kún uzaǵyna shóldep júrgen, — deıdi ata-ana. 

Venera Janserikovanyń úlken qyzy da osy balabaqshanyń tárbıelenýshisi. Bul oqıǵadan keıin ol qyzdaryn shyǵaryp alǵan. Prokýratýraǵa, sanıtarlyq-epıdemııalogııalyq qadaǵalaý departamentine jáne bilim basqarmasyna aryz jazǵan. Alaıda áli jaýap joq.

— Balanyń qolyn shyǵaryp alǵan jerine kelgende tárbıeshi aldyma turyp alyp, vıdeo túsirtpedi. Kamerany qosyp bergen dırektordyń kúıeýi ketip qaldy. Bir saǵat kútip, kelmegen soń, 102-ge soǵyp, polıtsııa shaqyrdym. Sol ýchaskelik polıtseıdiń kózinshe maǵan ashqa usyndy. Sadıktiń aqshasyn qaıtaramyz, 10 aı mamyrǵa deıin tegin kelsin dedi, — deıdi Venera Janserikova.

Osy oqıǵaǵa qatysty atalǵan jekemenshik balabaqshanyń dırektory pikir bildirdi. Onyń aıtýynsha, tárbıeshi men onyń kómekshisi jumystan shyǵarylǵan. 

— 17-si kúni bizdiń balabaqshada keleńsiz jaǵdaı boldy. Sol toptyń tárbıeshisi men onyń kómekshisi ekeýi de jumystan bosatyldy. Top jabyldy. Memlekettik organdar tekserý júrgizip jatyr. Ashanadan tamaq talapqa saı beriledi. Tárbıeshiniń kómekshisi ydys jýǵysy kelmeı osylaı jasaǵan. Ol kinásin moıyndady, — deıdi jekemenshik balabaqshanyń dırektory Raýshan Aıapbergenova. 

Munaıly aýdandyq bilim bóliminiń basshysy Batyrbek Demokratulynyń málimetinshe, atalǵan jaǵdaıǵa qatysty zerdeleý komıssııasy qurylyp, balabaqsha talaptarynyń oryndalýyna zerdeleý júrgizilgen. Anyqtalǵan kemshilikter boıynsha shara alý jóninde quzyrly organdarǵa hat joldanǵan. Sondaı-aq, bolǵan jáıtti habarlamaǵan polıtsııa qyzmetkerine aıyppul salynǵan. 

Buǵan deıin, Mańǵystaýda Qyzylsaı aýylynda balabaqsha tárbıelenýshileri jappaı astan ýlanyp qalǵanyn jazǵan bolatynbyz.