Mańǵystaýda avtogaz tutynýy nege kúrt artty
MAŃǴYSTAÝ. KAZINFORM — Mańǵystaý oblysynda avtogazǵa suranystyń kúrt artýy men jetkizý merziminiń uzarýyna baılanysty birqatar janarmaı quıý beketinde kezek paıda boldy. Óńir bıliginiń málimetinshe, qazir suıytylǵan munaı gazyn jetkizý turaqtandyrylyp, qosymsha kólemder bólingen.
Mańǵystaý oblysynyń kásipkerlik jáne saýda basqarmasynyń málimetinshe, óńir — suıytylǵan munaı gazyn eń kóp tutynatyn aımaqtardyń biri. Aı saıyn oblysqa shamamen 20 myń tonnaǵa deıin avtogaz qajet. Aı saıyn óńirge 18 myń tonna negizgi kólem jáne 1-2 myń tonnaǵa deıin qosymsha kólem bólinedi. Gaz negizinen «Qazaq gaz óńdeý zaýyty» men «Atyraý munaı óńdeý zaýytynan» jetkiziledi. Suranysty tolyq qamtamasyz etý úshin QR Energetıka mınıstrliginen aı saıyn qosymsha kólem suralady.
Suranystyń artýy mamyr-qyrkúıek aılarynyń aralyǵynda baıqalady. Buǵan óńirdiń týrıstik maýsymyna baılanysty kólik qozǵalysynyń artýy sebep. Bul kezeńde jergilikti turǵyndarmen qatar elimizdiń ózge óńirleri men shetelden keletin týrısterdiń sany ósedi.
28-29 maýsym kúni Qazaq gaz óńdeý zaýytynda elektr energııasyna qatysty másele týyndap, óndiris tómendegen.
— Atalǵan kúnderi Qazaq gaz óńdeý zaýytynda toq máselesi oryn alyp, óndiris kólemi tómendep ketken, qazir qaıta ornyna keltirildi. Qazirgi tańda Qazaq gaz óńdeý zaýyty tolyq óndiris kólemin berip otyr. Sonymen qatar Atyraý munaı óńdeý zaýytyndaǵy josparly jóndeý jumysyna baılanysty mamyr, maýsym aılarynda avtogaz qosymsha kólemderin «SNPS-Aqtóbemunaıgaz» AQ zaýytynan bólindi, — dep pikir bildirdi kásipkerlik jáne saýda basqarmasy.
Basqarmanyń deregine sáıkes, Mańǵystaý oblysynda 185 487 avtokólik tirkelgen. Onyń 103 918-i nemese 56 paıyzy gazben júredi. Sonymen qatar sońǵy úsh jylda óńirge sheteldik tranzıttik nómirmen 22 354 avtokólik ákelingen. Olardyń basym bóligi de suıytylǵan munaı gazyn paıdalanady.
Maýsym aıyna QR Energetıka mınıstrligi óńirge «Qazaq gaz óńdeý zaýytynan» 16 912 tonna, «Atyraý munaı óńdeý zaýytynan» 1 088 tonna negizgi kólem, sondaı-aq «SNPS-Aqtóbemunaıgaz» AQ-nan 1 512 tonna qosymsha suıytylǵan munaı gazyn bólgen.
— «SNPS-Aqtóbemunaıgaz» AQ-nan tıep-jóneltý tek temirjol tasymaly arqyly júzege asyrylady. Temir jol arqyly jetkizý 7 kúnnen joǵary ýaqytty quraıdy, bul kólik kezeginiń paıda bolýyna óz áserin tıgizdi. Qazirgi tańda 1 188 tonna kólemindegi avtogaz óńirdegi gaz toltyrý stantsııasyna kelip, stantsııalarǵa taratylyp jatyr, — dep tolyqtyrdy basqarma.
2026 jyldyń shilde aıyna Mańǵystaý oblysyna «Qazaq gaz óńdeý zaýyty» arqyly 17 476 tonna, «Atyraý munaı óńdeý zaýyty» arqyly 524 tonna negizgi kólem bólingen. Sonymen qatar qosymsha kólemdi birinshi kezekte Atyraý munaı óńdeý zaýytynan jetkizý josparlanyp otyr.
Aıta keteıik, Mańǵystaý oblysynda 600-den asa avtogaz quıý stantsııasy jumys isteıdi.
Ótken aptada Atyraýda da avtogaz tapshylyǵy týyndap, kórshi óńirlerden qosymsha kólem jetkizilgen edi.
Jalpy energetıka mınıstrliginiń málimetinshe, ishki naryqta jazǵy jáne týrıstik maýsym kezeńinde tutynýshylardy turaqty ári úzdiksiz qamtamasyz etýge jetkilikti kólemde munaı ónimderiniń qory qalyptastyrylǵan.
