Mańǵystaýda aýyr júk kólikterine jazǵy shekteý engizildi
AQTAÝ. KAZINFORM — Mańǵystaý oblysynda jazǵy kezeńge baılanysty aýyr júk kólikteriniń qozǵalysyna shekteý qoıyldy. Aýa temperatýrasy +25 gradýstan joǵary bolǵan kúnderi salmaǵy belgilengen normadan asatyn júk kólikterine saǵat 10:00–den 22:00–ge deıin respýblıkalyq mańyzy bar joldarmen júrýge bolmaıdy.
Osy talaptyń saqtalýyn kóliktik baqylaý ınspektorlary kún saıyn tekserip jatyr. Shekteý 1 maýsymnan 31 tamyzǵa deıin qoldanylady.
Bul talap jol jabynyn aptap ystyqtyń áserinen bolatyn búlinýden qorǵaýǵa baǵyttalǵan. Óıtkeni joǵary temperatýra kezinde aýyr kólikterdiń qozǵalysy asfalt jabyndysynyń buzylýyn jyldamdatyp, jol ınfraqurylymyna aıtarlyqtaı zııan keltiredi.
Shekteý halyqaralyq tasymalmen aınalysatyn, jolaýshylar tasymaldaıtyn, tez buzylatyn azyq-túlik, qaýipti júk pen gýmanıtarlyq kómek jetkizetin, sondaı-aq tótenshe jaǵdaılarǵa qatysy bar kólikterge qoldanylmaıdy.
Qazir Mańǵystaý oblystyq kóliktik baqylaý ınspektsııasynyń mamandary respýblıkalyq trassalarda aýyr júk kólikterin arnaıy tarazy arqyly tekserip jatyr. Inspektorlardyń aıtýynsha, talapty negizinen karerlerden qıyrshyqtas, qum, tas jáne basqa da qurylys materıaldaryn tasymaldaıtyn samosvaldar buzady.
— PGS, qıyrshyqtas, qum, tas tasymaldaıtyn júk kólikteriniń júrgizýshilerine qatysty ákimshilik hattamalar toltyryldy. Aıyppulǵa jol bermeý úshin júk tasymaldaýshylar zańda belgilengen salmaqtyq parametrlerdi saqtaýy qajet. Kólik toqtatylyp, salmaq normalary asyp ketken jaǵdaıda, júrgizýshige ákimshilik hattama toltyrylady. Anyqtalǵan kemshilikter joıylǵannan keıin ǵana ári qaraı júrýge ruqsat beriledi, — dedi oblystyq kóliktik baqylaý ınspektsııasy kóliktegi baqylaý bóliminiń bas mamany Azamat Abdyrahmanov.
Búginge deıin jazǵy shekteý talaptaryn buzǵan júrgizýshilerge qatysty 14 ákimshilik hattama toltyrylyp, 2 mln teńgeden astam aıyppul salynǵan.
Buǵan deıin, Mańǵystaý oblysynda marıhýanany zańsyz saqtady degen kúdikpen úsh adam ustaldy.
