Mańǵystaýda aýdandyq polıtsııa bastyǵy jaýapqa tartyldy

ASTANA. KAZINFORM - Túpqaraǵan aýdanynyń Polıtsııa bólimi bastyǵynyń mindetin atqarýshy jaýapqa tartyldy, dep habarlaıdy Mańǵystaý oblysy prokýratýrasynyń baspasóz qyzmeti. 

"Túpqaraǵan aýdanynyń Polıtsııa bólimi bastyǵynyń m.a. qadaǵalaý organynyń aktisin ýaqtyly qaramaǵany úshin Mańǵystaý oblysy Polıtsııa departamenti bastyǵynyń buıryǵymen tártiptik jaýaptylyqqa tartyldy. 

Azamattyq qarýdy satyp alýǵa ruqsat berý kezinde prokýrorlar zań buzýshylyqtardy anyqtady, ıaǵnı ruqsattardy, densaýlyqqa qasaqana jeńil zııan keltirý jáne turmystyq zorlyq-zombylyq jasaǵany úshin ákimshilik jaýapqa tartylǵan tulǵalardyń alǵany belgili boldy.

Atalǵan zań buzýshylyqtardy joıý maqsatynda Túpqaraǵan aýdanynyń Polıtsııa bólimine usyný engizilip, zańda belgilengen bir aı merzimde qaralmaǵan. Osyǵan baılanysty Polıtsııa bóliminiń basshylyǵyna qatysty tártiptik is qozǵaldy" delingen habarlamada.

Sonymen qatar prokýrordyń talabynan keıin zańsyz berilgen ruqsattardyń kúshi joıylyp, 4 qarý tárkilendi.

Prokýratýra aktilerin qaramaý, sol sııaqty tıisinshe qaramaý, oryndamaý ne prokýrordyń zańdy talaptaryn oryndamaý Qazaqstan Respýblıkasynyń zańdarynda belgilengen jaýaptylyqqa alyp keletindigi eskertiledi.