Mańǵystaýda bir otbasy jol apatyna ushyrap, otaǵasy qaza tapty
AQTAÝ. KAZINFORM – Qaıǵyly oqıǵa 28 shilde kúni tańǵy saǵat 06:00 shamasynda Shetpe – Saıótes avtojolynyń 243-shaqyrymynda boldy. Aldyn ala málimet boıynsha, Atyraý oblysynyń turǵyny basqarǵan Chevrolet Cobalt kóligi joldan shyǵyp ketip, aýdarylǵan.
Jol apaty saldarynan júrgizýshi oqıǵa ornynda qaza tapty. Kólikte onyń jubaıy men tórt balasy bolǵan. Áıel men balalar túrli dene jaraqatyn alǵan. 15 jastaǵy qyz aýyr jaraqat aldy. Onyń jaǵdaıy óte aýyr bolǵandyqtan, sanıtarııalyq avıatsııamen Mańǵystaý oblystyq balalar aýrýhanasyna jetkizilgen. 13 jastaǵy taǵy bir bala aýrýhanada jatyr. Onyń da jaǵdaıy aýyr. Dárigerler búıreginiń soǵylǵanyn jáne kólemdi gematoma bar ekenin anyqtaǵan.
7 jastaǵy balany da dárigerler aýrýhanaǵa jatqyzýdy usynǵan. Alaıda anasy em alýdan jazbasha túrde bas tartyp, jol apatynan qaza tapqan kúıeýiniń jerleý rásimine Atyraýǵa shuǵyl baratynyn aıtqan. Alaıda dárigerler áıelge emnen bas tartýdyń saldary bolýy múmkin ekenin esketken. Al 5 jasar balanyń jaǵdaıy turaqty, anasynyń janynda.
Oblystyq polıtsııa departamentiniń málimetinshe, jol apatyna deıin bul otbasynyń kóligin patrýldik polıtsııa qyzmetkerleri toqtatyp, júrgizýshige jol qaýipsizdigi talaptary túsindirgen. Sondaı-aq sharshaǵan jaǵdaıda demalyp alýǵa keńes bergen.
— Tańǵy saǵat alty shamasynda Shetpe — Saıótes avtojolynyń 252-shaqyrymynda Atyraý oblysynyń turǵyny basqarǵan Chevrolet Cobalt kóligi aýdarylyp ketken. Aldyn ala málimet boıynsha júrgizýshi kólikke ıe bola almaı qalǵan. Saldarynan júrgizýshi oqıǵa ornynda qaza tapty. Kóliktiń ishinde tórt balasy bolǵan. Atalǵan avtokólik oǵan deıin patrýldik polıtsııa rotasynyń qyzmetkerlerimen toqtatylyp, júrgizýshige jol qaýipsizdigi talaptary túsindirilip, sharshaǵan jaǵdaıda tynyǵý jóninde eskertý jasalǵan bolatyn. Alaıda berilgen eskertýlerge qaramastan, qaıǵyly jol-kólik oqıǵasynyń aldyn alý múmkin bolmady. Qurmetti júrgizýshiler, eshqashan jolda asyqpańyzdar. Eger ózińizdi sharshaǵan nemese uıqyly sezinseńiz, mindetti túrde qaýipsiz jerge toqtap, demalyńyz. Birneshe mınýttyq tynyǵý adam ómirin saqtap qalýy múmkin, — deıdi Mańǵystaý oblystyq polıtsııa departamenti patrýldik polıtsııa rotasynyń komandıri Taıman Ańshybaev.
Buǵan deıin, Aqtaýda stomatologııalyq emnen keıin 9 jasar balanyń jaq súıegi zaqymdandy.
