Mańǵystaýda ata-ana qamqorlyǵynsyz qalǵan bes balany bir otbasy asyrap aldy
AQTAÝ. KAZINFORM – Aqtaýlyq erli-zaıyptylar Bısenbek Yrysjanov pen Lázzat Abdashova ata-ana qamqarlyǵynsyz qalǵan bir úıdiń 5 balasyn túgeldeı asyryp alǵan. Olar tipti, memleketten beriletin qarjylaı kómekten bas tartqan. Óz balalary bola tura, aǵaıyndylardy qamqorlyǵyna alýyna ne sebep boldy? Kazinform tilshisi otanasymen tildesip, bir kúnde qurylǵan kópbalaly otbasynyń tynys-tirshiligimen tanysty.
Bısenbek Yrysjanov pen Lázzat Abdashova 2008 jyly otaý quryp, úsh jyldan keıin ǵana balaly bolǵan. Sodan keıin 8 jyldan keıin ekinshi perzenti ómirge kelipti. Balaly bolýdy armandap, uzaq jyl kútkende erli-zaıyptylar bala asyrap alýdy oılap, kezekke turǵan.
- 2008 jyly otaý quryp, 2011 jyly qyzymyzdy dúnıege ákeldim. Sodan arada jyldar ótip jatty. Biraq taǵy da balaly bolý armanymyz oryndalmaı júrdi. Mende «endi balaly bola almaımyz» degen qorqynysh boldy. Sóıtip, joldasym ekeýmiz aqyldasa kele, bala asyrap alýǵa sheshim qabyldap, 2013 jyly arnaıy portalǵa tirkeldik. Kúni-túni portaldan bala qaraımyz. Ol kezde qyzymyz 2 jasta bolǵan soń, odan jasy kishi sábı asyrap alýdy oılap júrdik. Biraq biz tańdaǵan nárestelerdiń jaǵdaıy asyrap alýǵa sáıkes kelmeı jatty. Osylaı júrip ýaqyttyń qalaı ótkenin bilmeı qaldyq. Arada 8 jyl ótkende, Alla bizge ekinshi perzentimizdi berdi. Sodan bala asyrap alamyz degen maqsatymyz keıinge qalyp qoıdy. Odan keıin, taǵy da uldy bolyp, úsh balanyń ata-anasy atandyq, - deıdi Lázzat Abdashova.
Yrysjanovtar áýleti jýyrda áleýmettik jeli arqyly qıyn jaǵdaıǵa tap bolǵan aǵaıyndy bes balany kórip, balalardyń tańdyryna alańdap, birden asyrap alýǵa sheshim qabyldaǵan.
- 2013 jyly bala asyrap alýǵa sheshim qabyldaǵan sátten bastap, qyzymyzdy sol jaǵdaıǵa daıyndadyq. «Balalar úıinde sen sekildi kishkentaı bópeler bar. Olar jalǵyz uıyqtaýǵa qorqady. Olarǵa ata-ana kerek. Sondyqtan biz úıge ákelip, qamqor bolýymyz kerek» dep, qyzymnyń basqa balalarǵa degen kózqarasyn jaqsy jaqqa buryp, júregin ashyp qoıdym. Odan keıin ózimiz balaly bolsaq ta, bala asyrap alý nıetimiz ózgerissiz qaldy. Jaqynda osy balalar týraly WhatsApp jelisinen kelgen habarlamany oqyp, birden qalalyq bilim bólimine júgirdim. Olar bes balanyń aǵaıyndy ekenin aıtyp, olardy bir-birinen aıyrýǵa bolmaıynyn aıtty. Barlyǵyn birge asyrap alýǵa usynys tastady. Ózim o bastan kópbalaly ana bolýdy armandaıtynmyn. Birden alamyn dep kelistim. Joldasym da bul sheshimimdi quptady. Sóıtip, bas aıaǵy 3-4 kúnde qujattarymyzdy jınap, balalardy úıimizge alyp kettik. Bul jerde bizge birneshe jyl boıy bala asyrap alý portalynda kezekte turǵanymyz da kómek boldy. Ekinshiden, balalardyń ekinshisi Jansulýdyń 4 jeltoqsan týǵan kúni eken, sol týǵan kúninde ata-ana syılaıynshy degen maqsatym meni qujatty eki ese jyldamdyqpen jınaýǵa ıtermeledi. Sosyn bizge qamqorshy nemese potranat bolýǵa tańdaý berildi. Biz potranattyqtan bas tarttyq. Sebebi ol kezde kelisimshartty jyl saıyn jańartyp otyrý kerek. Ol maǵan kóp jumys sekildi kórindi, bir jaǵynan balalaryma da yńǵaısyzdyq týdyrmas úshin qamqorshy bolýdy tańdadyq. Barlyq memleketten beriletin qarjylaı kómekten bas tarttyq. Tek balalarǵa beriletin mindetti járdemaqyny qaldyrdyq. Sol jerden árqaısysyna jeke-jeke depozıt ashtyq. Ol járdem aqy endi aı saıyn depozıtterine túsip otyrady, - deıdi otanasy.
Aǵaıyndy beseýdiń úlkeni - 15 jastaǵy er bala, 10 synypta oqıdy. Odan keıingi 12 jasta Jansulý esimdi qyz bala. Qalǵandary 10, 7 jáne 4 jastaǵy uldar. Balalar buǵan deıin Quryq aýylynda mektep ınternatta oqyǵan. Oqý jyly aıaqtalǵan soń, Aqtaý qalasyndaǵy ońaltý ortalyǵyna kóshirilgen. Jýyrda sot sheshimimen oblystyq otbasy úlgisindegi balalar aýylyna aýystyrylypty. Balalardyń ákesi aýyr jaǵdaıda al, anasy isti bolyp, qamaýǵa alynǵan.
- Analary shyǵyp kelgen soń, eger balalaryn ózine qaıta alǵysy kelse qarsylyǵym joq. Ol endi ózara mámilege baılanysty bola jatar. Jalpy maǵan ol jaǵy mańyzdy emes boldy. Eń mańyzdysy – osy balapandardyń bolashaǵynyń jarqyn bolýy, balalyq shaqtarynyń baqytty ótýine úles qosa alsaq, sonyń ózi jetip jatyr. Basqa artyq oıymyz joq. Balalardy alǵash kórgenimde, qatty janym ashyǵany ras. Olardyń ómir kórgeni kózderinen kórinip turdy. Erte eseıgen. Olarǵa ata-ana qamqorlyǵy jetpeı turǵanyn sezdim. Ásirese, Jansulý uıań, baýyrlaryna qamqor, óte sezimtal. Kemshilikterin de kórsetkisi kelmeıdi. «Aqshańyzdy qurtpaı-aq qoıyńyz, sabaǵymdy ózim oqyp alamyn» dep, jaýapkershilikti ózine alyp jatyr. Aınalamdaǵy adamdar tarapynan suraqtar óte kóp. Biraq ol suraqtar meni mazalamaıdy. Bul balalardy teginen eshqashan aıyrmaımyn. Kerisinshe ata tegin bilip óskenin qalaımyn, - deıdi Lázzat.
Balalar da jańa otbasyna kún ótken saıyn úırenisip keledi. Meıirimin tókken ata-anany birden «áke-ana» dep ataǵan. Ózinen úlken aǵasy bolatynyn estigen Lázzattyń tuńǵysh qyzy da úıge kelgen jańa baýyrlaryna syılyqtar alyp, úlken qýanyshpen qarsy alypty. Kishkentaıynan ata-anasynyń aıtqan sózderi qulaǵynda jattalyp qalǵany sonshalyq, balalardy jatyrqamaı baýyrmaldylyq tanytqan. Bir kúnde kópbalaly otbasyna aınalǵan otbasynyń otaǵasy Bısenbek baspanasyn keńeıtip, jańa páter de satyp alǵan.
- Balalarymyz úıge kelgen soń, árqaısysynyń jeke bólmesi bolsyn dep, úıimizdiń ústinde, joǵary qabattaǵy 4 bólmeli páterdi satyp aldyq. Aldaǵy ýaqytta ekeýin qosyp, penthaýs jasap almaqpyz, - deıdi kópbalaly ana.
Buǵan deıin, Elimizde jetim jáne ata-ana qamqorlyǵynsyz qalǵan balalardy qorǵaý tetikteri kúsheıtildi.