Mańǵystaýda astan ýlanǵan oqýshylardyń isine qatysty sotta tyń derekter shyqty
AQTAÝ. KAZINFORM — Munaıly aýdandyq sotynda 460 oqýshy jappaı astan ýlanǵan qylmystyq iske qatysty sot otyrysy bastaldy. Sot ashyq túrde ótip jatyr. Basty aıyptalýshy — ashana meńgerýshisi, jeke kásipker Dámetken Shákenova.
Sottyń alǵashqy otyrysynda ashana meńgerýshisine qatysty aıyptaýlar oqyldy.
Prokýrordyń málimetinshe, mektep ashanasynda kúndelikti tazalyq jumystary júrgizilmegen. Jumysshylar jeke gıgıena saqtamaǵan. Antısanıtarııanyń saldarynan shybyn-shirkeı qaptap ketken. Sondaı-aq, taǵamdardy saqtaý talaptary oryndalmaǵan. Al balalar jep, ýlanǵan kartop ezbesi bir kún buryn pisirilipti. Saraptama qortyndysy boıynsha aspazda, eki naýbaıshyda jáne basqa da as úı qyzmetkerlerinde stafılokokk anyqtalǵan.
Qylmystyq is boıynsha 395 balanyń ata-anasy jábirlenýshi bolyp tirkelgen. Búgingi sot otyrysynda sol ata-analar bolǵan jáıtti baıandady. Odan keıin 50 kýágerden jaýap alynady. Sondyqtan qylmystyq istiń núktesi qashan qoıylary belgisiz.
Eske salaıyn, oqıǵa byltyr 6 qyrkúıekte Munaıly aýdany Besshoqy aýylynda boldy. Mektep ashanasynda tamaqtanǵannan oqýshylar ózderin jáısiz sezinip, dárigerdiń kómegine júgingen. Jalpy sany 460 oqýshy aýyryp, aýrýhanaǵa jatqyzyldy. Balalardyń bárine «astan ýlaný» dıagnozy qoıyldy.
Mańǵystaýda alpysqa jýyq oqýshy astan ýlandy.
Keıin ýlanǵan oqýshylardyń sany 67-ge jetti.
Oqýshylardyń jappaı ýlanýy: ashana ydys jýýshysy dızenterııa tasymaldaýshy bolyp shyqty.