Mańǵystaýda áskerı qyzmetshiniń qaza tapqany týraly aqparat jalǵan bolyp shyqty
AQTAÝ. KAZINFORM – Mańǵystaý oblysynda taǵy bir áskerı qyzmetshiniń qaza tapqany týraly áleýmettik jelide taraǵan aqparat shyndyqqa janaspaıdy. Bul týraly Jalǵan aqparatqa qarsy kúres ortalyǵy málimdedi.
Ortalyqtyń habarlaýynsha, Facebook áleýmettik jelisinde Kaspııdegi qaıǵyly oqıǵaǵa baılanysty taǵy bir áskerı qyzmetshiniń qaza tapqany týraly aqparat taraǵan.
Іshki ister mınıstrligi, Ulttyq ulan, Shekara qyzmeti jáne Qorǵanys mınıstrligi usynǵan málimetterge sáıkes, áskerı qyzmetshiniń qaza bolǵany týraly aqparat rastalmady.
- Dezınformatsııaǵa qarsy kúres ortalyǵy áleýmettik jeli qoldanýshylaryn resmı derekkózge siltemesi joq aqparatqa senbeýge shaqyrady. Jalǵan aqparat taratý Qazaqstan Respýblıkasynyń zańnamasyna sáıkes quqyqtyq jaýapkershilikke ákep soǵýy múmkin, - delingen ortalyq habarlamasynda.
Eske salaıyq, 24 qyrkúıekte oqý-jaýyngerlik tapsyrmany oryndaý kezinde Kaspıı teńizinde qaıǵyly jaǵdaı boldy. Aýa raıynyń kúrt nasharlap, jeldiń kúsheıýi saldarynan áskerı qyzmetshilerdi teńiz aǵysy alyp ketken.
Buǵan deıin Memleket basshysy Qorǵanys mınıstrligindegi istiń jaı-kúıin keshendi tekserý jónindegi komıssııa qurýdy tapsyrǵan bolatyn. Komıssııaǵa atqarylǵan jumystyń alǵashqy nátıjeleri týraly Prezıdentke jeti kún ishinde baıandaý mindeti júkteldi.
Sondaı-aq Prezıdent Dáýren Qosanovty Qorǵanys mınıstri qyzmetinen bosatyp, bul laýazymǵa Aıdos Myrzahmetovti taǵaıyndady.
Dezınformatsııaǵa qarsy kúres ortalyǵy Kaspııdegi qaıǵyly oqıǵaǵa qatysty birneshe jalǵan aqparattyń taraǵanyn habarlaǵan edi. Qorǵanys mınıstrligi eki matrosqa qatysty taraǵan aqparatty da joqqa shyǵardy.
Buǵan deıin, Quryltaı depýtaty Nıkıta Shatalov Kaspııdegi qaıǵyly oqıǵaǵa jaýap qyzmetten bosatýmen jáne qamaýǵa alýmen shektelmeýi kerek ekenin aıtty.
