Kaspııde qaza tapqan áskerıler: eki bap boıynsha qylmystyq is qozǵalyp jatyr

24 qyrkúıek kúni saǵat 22:30-da Premer-Mınıstrdiń orynbasary Qanat Bozymbaevtyń tóraǵalyǵymen áskerı qyzmetshilerdiń qaza bolýyna baılanysty qurylǵan Úkimettik komıssııanyń otyrysy ótti.

Іshki ister mınıstriniń orynbasary Sanjar Ádilovtiń baıandaýynsha, Qylmystyq kodekstiń 453-babynyń 2-bóligi – «Aýyr zardaptarǵa ákep soqqan qyzmetke salǵyrt qaraý» jáne 465-baby – «Keme júrgizý qaǵıdalaryn buzý» boıynsha qylmystyq is qozǵaldy.

Tergeý aıasynda vedomstvoaralyq jedel-tergeý toby quryldy. Qazir birqatar tergeý jáne jedel-izdestirý is-sharasy júrgizilip jatyr. Jumysqa tıisti mamandar tartylyp, qajetti sot saraptamalary taǵaıyndaldy.

Qanat Bozymbaev bolǵan oqıǵanyń barlyq mán-jaıyn qysqa merzimde tolyq anyqtap, qaıǵyly jaǵdaıǵa kináli tulǵalarǵa qatysty tıisti sharalar qabyldaýdy tapsyrdy.

Otyrysta qaza bolǵan áskerı qyzmetshilerdiń otbasylaryna kómek kórsetý máselesine erekshe nazar aýdaryldy. Premer-Mınıstrdiń orynbasary memleket tarapynan olarǵa qajetti áleýmettik jáne materıaldyq qoldaý kórsetiletinin atap ótti.

– Zańda kózdelgen materıaldyq kómekten bólek, kómek kórsetkisi keletin azamattardan kóptegen ótinish túsip jatyr. Qazaqstan Halyq Keńesiniń músheleri qaza bolǵan áskerı qyzmetshilerdiń otbasylaryna materıaldyq kómek kórsetetinderin málimdedi. Olardyń bireýi qaza bolǵan ár áskerı qyzmetshiniń otbasyna 25 mln teńgeden bóldi. Sondaı-aq birqatar iri bıznes ókilderi de materıaldyq kómek kórsetýge nıet bildirdi, – dedi Qanat Bozymbaev.

Ol Eńbek jáne halyqty áleýmettik qorǵaý mınıstrligine Mańǵystaý oblysynyń ákimdigimen birlesip, qaza bolǵan áskerı qyzmetshilerdiń otbasylaryna baǵyttalǵan barlyq qarajattyń bólinýiniń ashyqtyǵy men baqylaýyn qamtamasyz etýdi tapsyrdy. Kómek naqty adresattarǵa tolyq kólemde kórsetilýge tıis.

Densaýlyq saqtaý vıtse-mınıstri Manas Ramazanovtyń málimetinshe, oqıǵadan keıin medıtsınalyq mekemege jetkizilgen áskerı qyzmetshiniń jaǵdaıy turaqty. Onyń ómirine qaýip tónip turǵan joq, qajetti medıtsınalyq kómek kórsetilip jatyr.

Otyrysqa Іshki ister, Tótenshe jaǵdaılar, Eńbek jáne halyqty áleýmettik qorǵaý, Densaýlyq saqtaý, Kólik mınıstrlikteriniń vıtse-mınıstrleri, UQK Shekara qyzmeti dırektorynyń orynbasary, Bas áskerı prokýror jáne Mańǵystaý oblysynyń ákimi Nurdáýlet Qılybaı qatysyp, baıandama jasady.

Úkimettik komıssııanyń jumysy jalǵasyp jatyr.

Eske salaıyq, 2026 jylǵy 24 qyrkúıekte Kaspııdegi áskerı oqý-jattyǵý kezinde 9 áskerı qyzmetshi qaza tapqanyn habarlaǵanbyz. Úsh áskerı qyzmetshi qutqaryldy. Olardyń bireýi aýrýhanaǵa jatqyzyldy.

Keıinnen Kaspııde qaza bolǵan áskerı qyzmetshilerdiń sany 12-ge jetip, ekeýi izdestirilip jatqany habarlandy.

Qorǵanys mınıstrligi oqý-jattyǵý kezinde qaza tapqan áskerı qyzmetshilerdiń tizimin jarııalady.

Áskerı qyzmetshilerdiń qaza bolý faktisi boıynsha qylmystyq is qozǵalyp, tergelip jatqanyn jazdyq.

Sonymen qatar, Prezıdent Qasym-Jomart Toqaev Mańǵystaý oblysynda áskerı oqý-jattyǵý kezindegi qaıǵyly oqıǵa saldarynan qaza tapqan áskerı qyzmetshilerdiń týǵan-týystaryna kóńil aıtty.

Áskerılerdiń qazasynan keıin Aqtaýda úsh kúnge josparlanǵan merekelik sharalar ótpeıtini aıtyldy.