Mańǵystaýda áskerı qyzmetshi shartty neke quryp, memleketke 43 mln teńge shyǵyn keltirdi
AQTÓBE. KAZINFORM – Ol turǵyn úı ótemaqysyn alý úshin tanysynyń áıeline úılendi. Otbasyndaǵy ár janǵa 8 674 038 teńgeden aýdarylǵan.
Aqtóbe garnızonynyń áskerı sotynda UQK Shekara qyzmeti Mańǵystaý oblystyq departamentiniń basqarmasynda aǵa jedel ýákil bolǵan K.Almatqa qatysty qylmystyq is qaraldy. Oǵan Qylmystyq kodekstiń «Alaıaqtyq» baby boıynsha aıyp taǵyldy. Sot kabınetindegi is materıalyna súıensek, 20 jyldan astam tájirıbesi bar áskerı qyzmetshi turǵyn úı ótemaqysyn alý úshin quıturqy áreketke barady. Ol tórt balasy bar tanysynyń áıelimen shartty neke qııady. Bul qyzmet úshin 3 000 000 teńge syıaqy berýge ýáde etken.
2022 jyly tamyzda kelisim júrip, tanysy resmı túrde ajyrasady. Al ózi sol jyly qyrkúıekte nekesin buzady. Eki neke de buzylyp, oıǵa alǵan isti aıaqtaý úshin sottalýshy K.Almat Qostanaı oblysyna barady. Sóıtip 2022 jyly qazan aıynda onlaın ótinish berip, neke zańdastyryldy. Qujattardyń barlyǵyn jınap, 2023 jyly naýryzda tórt balasy men erli-zaıypty altaýyna 50 157 942 teńge turǵyn úı ótemaqysy beriledi. Qarjy bankten ashylǵan arnaıy esepshotqa túsedi. Jyl sońyna qaraı bank esepshotynda turǵan aqshany ıemdený úshin sottalýshy 50 503 793 teńgege Qostanaı qalasynan úı satyp alady. Ol da óziniń tanysynyń úıi bolyp shyqty. 2024 jyly aqsha bir bankten, ekinshi bankke aýdarylyp, keıin qolma-qol sheship alady. Kelisim boıynsha tanysynyń otbasyna 3 000 000 teńge beredi.
Al 2024 jyldyń mamyr aıynda paıda tabý úshin qurylǵan shartty neke buzylady.
Sotta sottalýshy K.Almat ózine taǵylǵan aıypty moıyndamady. Ol týysqan tanysynyń áıeli usynys jasaǵan soń kómekteskenin, al óz zaıybymen aradaǵy qarym-qatynas ýshyǵyp, ajyrasqanyn aıtty. Shartty neke qıǵan áıel bolsa munyń bárin joqqa shyǵardy.
Aıta keteıik, memleket ár otbasy múshesine 8 674 038 teńgeden eseptep, qarjy bóldi. ıAǵnı sottalýshynyń ózin qospaǵanda bes adamǵa 43 370 190 teńge shyǵyn keltirdi. Sot úkimimen sottalýshy K.Almat Qylmystyq kodekstiń «Alaıaqtyq» baby boıynsha aıypty dep tanylyp, 6 jylǵa bas bostandyǵynan, podpolkovnık sheninen aıyryldy. UQK Shekara qyzmeti Mańǵystaý oblystyq departamentiniń azamattyq talap aryzy qanaǵattandyryldy. Sottalýshy memleketke 43 370 190 teńgeni qaıtarýy tıis.
Sot úkimi zańdy kúshine engen joq.
Eske salsaq, áskerı qyzmettiń bedeline nuqsan keltirgen azamatqa 82 700 teńge aıyppul salyndy.
