Arqarlardyń tóldeýi kezinde Mańǵystaýdaǵy tabıǵı park aýmaǵy erekshe qorǵalady
AQTAÝ. KAZINFORM. Naýryz aıynyń 20 bastap elimizdiń birneshe aımaǵynda taý arqarlaryn sanaý naýqany bastaldy.
Bul rette Mańǵytaý oblysynda dala janýarlaryn sanaý jumysy kúzde ótkiziledi. Oblystaǵy «Qyzylsaı» memlekettik óńirlik tabıǵı parkiniń dırektory Myńbergen Qarataýov arqarlardy arqarlardy sanaý jumystary josparly túrde júzege asatynyn málimdedi.
«Naýryzdyń sońynan mamyr aıynyń basyna deıin arqarlar tóldeıdi. Sol ýaqytta park aýmaǵynda tynyshtyqty saqtaý úshin bizdiń ınspektorlar kúni-túni jumysyn atqaryp jatyr. Bizde sanaq negizinen kúz aılaryn ótedi. Kóktemgi josparǵa saı ishki tártip boıynsha ózimiz sanaq júrgizemiz», — dedi Myńbergen Qarataýov.
Bul rette «Ohotzooprom ÓB» RMQK qyzmetkerleri jáne oblystyq orman sharýashylyǵy jáne janýarlar dúnıesi aýmaqtyq ınspektsııasy men «Zoologııa ınstıtýty» RMK ókilderimen birlese otyryp taý arqaryna (arqarǵa) kóktemgi áýe sanaǵy jumystary júrgizilip jatqanyn málimdedi.
«Kóktemgi áýe sanaǵy jumystary Túrkistan, Jambyl, Qaraǵandy, Pavlodar, Shyǵys Qazaqstan, Jetisý jáne Abaı oblystarynyń aýmaqtarynda sáýir aıynyń sońyna deıin ótedi», — dedi elimizdiń ekologııa mınıstrliginiń baspasóz qyzmeti.
Buǵan deıin Mańǵystaýdaǵy «Qyzylsaı» tabıǵı parkinde arqar men qaraquıryq sany kóbeıgeni týraly aıtylǵan edi. Erekshe qorǵaýǵa alynǵan arqar basynyń kóbeıýi men bulaqtardyń kózin ashýda memlekettik ınspektorlar eleýli úles qosyp otyr.
