Mańǵystaýda anasynyń atyna jer rásimdegen aýyl ákimi aıyppul tóledi

AQTAÝ. KAZINFORM – Ákimshilik is Beıneý aýdandyq sotynda qaraldy. Bul týraly aýdandyq sottyń baspasóz qyzmeti habarlady.

Sot anyqtamasyna sáıkes, Beıneý aýylynyń ákimi Nurjan Kenbaev aýyl ishinen turǵyn úı salýǵa arnalǵan jer telimin óziniń anasynyń atyna rásimdegen. Biraq bul áreketi týraly tikeleı basshysyna jazbasha túrde eskertpegen.

- Zańǵa sáıkes, memlekettik qyzmetker týysqan adamdarǵa qatysty sheshim qabyldaıtyn jaǵdaıda, bul týraly óz basshylyǵyn aldyn ala habardar etýi tıis. Bul talap saqtalmaǵandyqtan, ákimniń áreketi zańbuzýshylyq bolyp tanyldy, - delingen habarlamada.

Sotta ákim óz kinásin moıyndap, otbasynyń qarjylyq jaǵdaıyn alǵa tartyp, aıyppul kólemin azaıtýdy suraǵan. Biraq sot jeńildetetin mán-jaılardy anyqtamaǵan.

- Sot sheshimimen Nurjan Kenbaev QR Ákimshilik quqyq buzýshylyq týraly kodekstiń 680-baby boıynsha kináli dep tanylyp, 393 200 teńge kóleminde aıyppul tóleýge mindetteldi. Sheshim zańdy kúshine endi, - deıdi Beıneý aýdandyq sotynyń baspasóz qyzmeti.

Buǵan deıin Mańǵystaýda ekologııalyq zań talaptaryn buzǵan 11 karerdiń anyqtalǵany týraly jazǵan bolatynbyz.