Mańǵystaýda ammıak-karbamıd keshenin salý jumystary pysyqtaldy
ASTANA. KAZINFORM – Premer-mınıstrdiń birinshi orynbasary Nurlybek Nálibaevtyń tóraǵalyǵymen Mańǵystaý oblysynda ammıak-karbamıd keshenin salý boıynsha strategııalyq ınvestıtsııalyq jobany iske asyrý máseleleri jóninde keńes ótti.
Keńeske Energetıka, Ónerkásip jáne qurylys mınıstrlikteriniń, «QazaqGaz» UK» AQ-nyń ókilderi jáne «KazAzot PRIME» JShS basshylyǵy qatysty.
Ammıak-karbamıd kesheni jobasy Memleket basshysynyń tapsyrmasy boıynsha iske asyrylyp jatqan 17 iri ınvestıtsııalyq jobanyń tizbesine kiretini, sondaı-aq gaz-hımııa salasyn damytý, eldiń ónerkásiptik áleýetin nyǵaıtý jáne tabıǵı gazdy tereń óńdeý deńgeıin arttyrý úshin strategııalyq mańyzǵa ıe ekeni atap ótildi.
«KazAzot PRIME» JShS basshysy Arman Máýleshev jobanyń iske asyrylý barysy, júrgizilip jatqan jumystar jáne keshen qurylysynyń taıaýdaǵy kezeńderi týraly habardar etti.
Premer-mınıstrdiń birinshi orynbasary ishki naryqty otandyq mıneraldy tyńaıtqyshtarmen qamtamasyz etý, eksporttyq áleýetti damytý, jańa jumys oryndaryn qurý jáne Mańǵystaý oblysynyń áleýmettik-ekonomıkalyq damýy úshin jobanyń mańyzdylyǵyn atap ótip, ony iske asyrýdyń bekitilgen kestesin qatań saqtaý qajettigin basa aıtty.
Keńestiń qorytyndysy boıynsha memlekettik organdarǵa jáne múddeli uıymdarǵa týyndaıtyn máselelerdi jedel sheshýge jáne strategııalyq ınvestıtsııalyq jobanyń ýaqtyly iske asyrylýyn qamtamasyz etýge baǵyttalǵan tıisti tapsyrmalar berildi.
Aıta ketelik Úkimette balalardyń jazǵy demalysyn uıymdastyrý, ınklıýzıvti bilim berýdi damytý máseleleri talqylanǵan edi.
