Mańǵystaýda Amal merekesine oraı qyryqtan astam mádenı shara ótedi
AQTAÝ. KAZINFORM - Mańǵystaýda Amal merekesine oraı 40-tan astam kıiz úı tigilip, mádenı- sporttyq sharalar uıymdastyrylady.
Jyldaǵy dástúr boıynsha Mańǵystaýda 14 naýryz Amal merekesi halyqaralyq dárejede toılanbaq. Mańǵystaý aýdanyndaǵy Otpantaýda 40-tan astam kıiz úı tigilip, túrli kontserttik, sporttyq sharalar ótkiziletini aıtyldy.
Bul týraly Mańǵystaý oblystyq mádenıet, arhıvter jáne qujattama basqarmasynyń bólim basshysy Ásem Áshirova málimdedi.
Onyń aıtýynsha, atalǵan merekege QR Prezıdenti ákimshiliginiń, Mádenıet jáne aqparat mınıstrliginiń ókilderi, Astana, Almaty, Shymkent qalalary men óńirlerdegi ákimdik ókilderi jáne Túrik elinen jyrshy Irfan Gerdal, Ózbekstannan Mýhhamad Eshboev, Qaraqalpaqstannan Salamat Aıapov arnaıy shaqyrylyp otyr.
"13 naýryz kúni «Otpan» tarıhı-mádenı kesheniniń Jyńǵyldy aýyldyq atshabarynda at báıgesi, qyz qýý, tazy júgirtý sııaqty ulttyq sport oıyndary ótkizilip, keıin «Aqsaraı» mýzeı kesheni tanystyrylady. Merekelik dýman ári qaraı Mańǵystaý aýdanyndaǵy ónerpazdardyń kontserttik baǵdarlamasymen jalǵasyn tabady. Oǵan qosa «Qarashańyraq» alańyndaǵy sahnada teatrlandyrylǵan qoıylym jáne Qazaqstannyń Halyq ártisi Roza Rymbaeva, ánshi Álı Oqapov, Mádı Rymbaev, Túrkııa, Ózbekstan, Qaraqalpaqstannan arnaıy kelgen jyrshylary jáne oblys ónerpazdarynyń merekelik kontserti ótedi", - dedi Ásem Áshirova.
Budan bólek, «Qarashańyraq» ǵımaraty sahnasynda «Birlik Otyn» jaǵý rásimi, qonaqtarǵa keshki qonaqasy, aýyzashar dastarhany jaıylady. Merekelik shara Túrkııa, Ózbekstan, Qaraqalpaqstan elderinen kelgen jyrshylar jáne oblys jyrshylarynyń qatysýymen jyr keshine, óńirlik jazba aqyndar músháırasyna ulasatyn bolady.
Merekelik toı-dýmannyń ekinshi kúni 14 naýryzda Otpan tarıhı-mádenı kesheninde oblys ónerpazdarynyń kontserttik baǵdarlamasy josparlanǵan. Sondaı-aq, balýandar kúresi, «Sálem — sózdiń atasy» jáne «Qaraqazannan dám tatý» merekelik sharalary, «Tusaýyńdy keseıin, kúrmeýińdi shesheıin» atty tanymal tulǵalardyń sábılerdiń tusaýyn kesý rásimi ótetin bolady.
Amal merekesin toılaý 14 naýryz keshki saǵat 19:00-de Aqtaý qalasyndaǵy Amfıteatrda Roza Rymbaeva men Mańǵystaý óner juldyzdarynyń kontsertimen támamdalady.
