Amal: Mańǵystaýdaǵy Otpan taýda «Birlik oty» jaǵyldy
AQTAÝ. KAZINFORM — Mańǵystaýlyqtar 14 naýryz kúni jylda «Adaı ata — Otpan taý» tarıhı-mádenı kesheninde bas qosyp, kórisedi. Bıyl da sol ádetten tanbaı bir kún buryn Otpan taýda jınaldy.
Merekelik sharalardy uıymdastyrý alqasynyń múshesi Súıindik Rızanyń aıtýynsha, eki kúnde jıyrmadan astam shara josparlanǵan.
— Otpan taýǵa 58 aǵash úı tigildi. Shamamen 10 myńdaı adamdy qarsy alýǵa múmkindik bar. Amal merekesin kórý úshin Qazaqstannyń túkpir-túkpirinen qonaqtar kelip jatyr. Sondaı-aq, merekelik is-sharaǵa atsalysamyz dep Ázerbaıjan, Túrkııa, Ózbekstan men Túrikmenstan elderinen dástúrli ánshileri keldi. Osy jańa «Amaldyń aq tańy» atty oblystyq sýretshiler pleneriniń ashylý saltanaty ótti. Teatrlandyrylǵan kórinis kórsetilip, «Birlik oty» jaǵyldy, — deıdi Súıindik Rıza.
Amal merekesine arnaıy kelgen meımandar bıylǵy sharalardyń joǵary deńgeıde uıymdastyrylǵanyn atap ótti.
— Amal merekesi úshin Mańǵystaý óńirine arnaıy keldim. Buryn telearna arqyly kóretin bolsaq, búgin ózim kýá bolyp turmyn. Otpan taýyna kóterilip, Adaı ata kesenesinde boldyq. Halyqtyń kóńil-kúıi jaqsy. Óte joǵary deńgeıde uıymdastyrylǵan. Amaldan amalǵa aman-esen jete bereıik! Elimiz tynysh bolsyn! , — deıdi Aqtóbe qalasynyń turǵyny Saltanat Agısova.
Sheteldik qonaqtar da mańǵystaýlyqtarǵa aqjarma tilegin arnady.
— Mańǵystaý ólkesi, sondaı-aq kúlli qazaq halqy úshin erekshe meıram — Amal merekesine qatysý men úshin úlken mártebe. Halyqtyń qonaqjaı qasıeti, jyly qabyldaǵany qýantady. Ulttyq kıim kıgen kópshiliktiń bir-birimen qol alysyp kórisýi ádemi kórinis. Barsha qazaqstandyqtardy Amal merekesimen quttyqtaımyn! , — deıdi Ózbekstan Respýblıkasynyń ártisi Roza Radjapova.
Amal merekesi aıasynda qazaqsha kúres, túıe palýan, toǵyzqumalaq sııaqty ulttyq sport túrlerinen jarystar, oshaq báıge, taı jarys pen alaman báıge, shashaq qulaqty tazy ıtteriniń jarysy josparlanǵan.
Sondaı-aq, Murat Óskinbaev atyndaǵy Mańǵystaý oblystyq fılarmonııasynyń ónerpazdary men Túrkııa, Ázerbaıjan, Ózbekstan, Qyrǵyzstan memleketteri ánshileriniń qatysýymen gala-kontsert ótti. Jyr-terme keshi bolyp, oǵan onnan astam jyraý qatysty.
Buǵan deıin, Aqtaý qalasy ákiminiń orynbasary bir-aq kún jumys istep, qyzmetinen ketkeni týraly jazǵan bolatynbyz.