Mańǵystaýda alıment tólemeı júrgen 100-den astam adam jaýapqa tartyldy
AQTAÝ. KAZINFORM – Bıylǵy birinshi toqsanda Mańǵystaý oblysynda alıment tóleýden qasaqana jaltarǵan 104 boryshker jaýapqa tartyldy, dep habarlaıdy Mańǵystaý oblystyq prokýratýrasynyń baspasóz qyzmeti.
Olardyń ishinde 22 adam qylmystyq, 82 adam ákimshilik jaýapqa tartyldy (barlyq faktiler boıynsha sot aktileri bar).
Jaýapqa tartylǵandardyń arasynda alıment tóleýden jaltarý maqsatynda uzaq ýaqyt boıy ádeıi jumysqa ornalaspaı, sondaı-aq tabystary men jumys ornyn jasyrǵan tulǵalar bar.
-Júrgizilgen jumys nátıjesinde prokýratýra organdary 53 mln teńge kóleminde alıment óndirip, 366 kámeletke tolmaǵan adamnyń quqyqtary qorǵaldy. Atalǵan baǵyttaǵy jumys júrgizile beredi, -delingen habarlamada.
Osyǵan deıin Qostanaıda prokýratýra bilim qyzmetkerleriniń 5 mln teńge qosymsha tólem alýyna yqpal etkeni týraly jazdyq.
