Mańǵystaýda alǵash ret máıittik donor tirkeldi

AQTAÝ. KAZINFORM — Aqtaýda alǵash ret adam qaıtys bolǵannan keıingi donorlyq jaǵdaı tirkeldi. Bul týraly Mańǵystaý oblystyq kópbeıindi aýrýhanasynyń baspasóz qyzmeti habarlaıdy.

Oblystyq kópbeıindi aýrýhanasynda 45 jastaǵy er adamnyń mı ólimi tirkelgen. Osy jaǵdaıǵa baılanysty óńirlik úılestirýshi Indıra Amanqosqyzy men statsıonarlyq koordınator Іlııas ıÝsýpuly týystaryna qajetti túsindirý jumystaryn júrgizgen. Jaqyndary batyldyq tanytyp, donorlyqqa kelisim bergen soń aýrýhana bazasynda Densaýlyq saqtaý mınıstrliginiń Transplantattaýdy jáne joǵary tehnologııalyq medıtsınalyq qyzmetterdi úılestirý jónindegi respýblıkalyq ortalyǵy mamandarymen birlesip júrek alý operatsııasy jasaldy.

Donordyń júregi uzaq ýaqyt kútý paraǵynda turǵan naýqasqa sátti transplantatsııalandy. Otany Densaýlyq saqtaý mınıstrliginiń Transplantatsııa ortalyǵynyń mamandary sátti júzege asyrdy.

— Bul — óńirimiz úshin erekshe mańyzdy oqıǵa. Donorlyq mı óliminiń resmı rastalýynan keıin barlyq medıtsınalyq rásimder zańdy túrde oryndaldy. Biz donorlyqqa sheshim qabyldaǵan otbasyna shynaıy qurmet kórsetemiz jáne adam ómirin qutqarýǵa baǵyttalǵan izgi qadamdary úshin alǵys aıtamyz, — deıdi Mańǵystaý oblystyq kópbeıindi aýrýhanasy dırektorynyń mindetin atqarýshy Berik Kaýnov.

Mańǵystaý oblysy boıynsha transplantatsııa jónindegi óńirlik úılestirýshi Indıra Amanqosqyzynyń aıtýynsha, qazir jalpy kútý paraǵynda 175 mańǵystaýlyq bar. Onyń ishinde 165 eresek pen 3 bala — búırek, 4 eresek, 1 bala — baýyr, 2 eresek júrek transplantatsııasyn kútip otyr.

Buǵan deıin, Qazaqstanda aǵza aýystyrýǵa muqtaj 4 myńnan astam adam baryn jazǵanbyz.