Mańǵystaýda áleýmettik mańyzy bar azyq-túlik taýarlarynyń 8 túri arzandady
AQTAÝ. KAZINFORM – Mańǵystaý oblysynda byltyrǵy jylmen salystyrǵanda bıyl áleýmettik mańyzy bar azyq-túlik taýarlarynyń 8 túri arzandaǵan. Bul týraly QR Saýda jáne ıntegratsııa mınıstrliginiń baspasóz qyzmeti habarlady.
Bir jyl ishinde birinshi sorttaǵy bıdaı uny 335 teńgeden 302 teńgege (10 %), qaraqumyq jarmasy 321 teńgeden 219 teńgege (32%), kúnbaǵys maıy 764 teńgeden 687 teńgege (10%), sábiz 256 teńgeden 223 teńgege (12,9%), pııaz 169 teńgeden 151 teńgege (10,7%), qyryqqabat 193 teńgeden 184 teńgege (4,7%), kúrish 478 teńgeden 472 teńgege (1,3%), qumsheker 418 teńgeden 393 teńgege (6%) arzandaǵan.
Mańǵystaý oblystyq kásipkerlik jáne saýda basqarmasynyń basshysy Dastan Muratalıev oblysta 340 saýda nysany men jergilikti ákimdik arasynda ÁMAT taýarlaryna qosatyn saýda ústemesin 15-ten 10-ǵa túsirý týraly memorandým jasalǵanyna toqtaldy. Bul – óńirdiń azyq-túlik qaýipsizdigin qamtamasyz etý men jergilikti ónim óndirýshilerdi qoldaýǵa baǵyttalǵan shara.
Mańǵystaý oblysyndaǵy azyq-túlik taýarlaryna baǵa belgileýdiń barlyq tizbegindegi deldaldyq shemalaryn tergep-tekserý komıssııasynyń jyl basynan beri 53 otyrysy ótti. Nátıjesinde 71 kásipkerlik sýbektige QR «Ákimshilik quqyq buzýshylyq týraly» kodeksiniń 204-4 baby ÁMAT taýarlaryna 15% joǵary ústeme aqy qosqany úshin eskertý berilse, 9 kásipkerlik nysanǵa 166 140 teńge aıyppul toltyryldy. Al vıtrınadaǵy baǵa men kassalyq chektegi baǵy sáıkes kelmegeni úshin óńirde 21 bızneske 1 303 276 teńge aıyppul salyndy.
Oblysqa qarasty barlyq eldi-mekendegi monıtorıngtik «Halyq baqylaýy» toby keıingi bir aptada oblystaǵy 2 myńǵa jýyq «úı janyndaǵy» azyq-túlik dúken ıelerine QR «Saýda qyzmetin retteý týraly» Zańyna sáıkes ÁMAT taýarlaryna 15%-dan astam ústeme aqyǵa jol bermeý týraly túsindirme jumystary júrgizildi.
