Mańǵystaýda Aqshuqyr aýyly jaǵalaýynan 70-ke jýyq ıtbalyqtyń óleksesi tabyldy
AQTAÝ. KAZINFORM — Túpqaraǵan aýdany Aqshuqyr, Saıyn Shapaǵatov eldi mekenderiniń jaǵalaýynda jatqan ıtbalyq ólekseleri týraly quzyrly organdarǵa turǵyndar habarlaǵan. Soǵan sáıkes, mamandar teńiz jaǵasyna monıtorıng júrgizip, ólekselerdi anyqtady.
Oblystyq balyq ınspektsııasy basqarmasy basshysynyń mindetin atqarýshy Qonarbaı Bazarbaevtyń aıtýynsha, ıtbalyqtardyń basym bóligi tehnıka bara almaıtyn jerlerde jatyr. Olar byltyr kúzde jappaı qyrylý kezinde jınalmaı nemese kózden tasa qalǵan bolýy múmkin.
— Byltyr osy aýmaqtan shamamen 130-ǵa jýyq ólekse anyqtalǵan edi. Sodan jınalmaı qalǵan bolýy da múmkin. Jergilikti ákimdik búgin Aqshuqyr jaǵalaýynan bastap, kólik bara alatyn jerlerdegi ıtbalyqtar jınap jatyr. Al tehnıka bara almaıtyn aýmaqtardaǵy ólekselerdi qalaı jınaımyz, ony aqyldasyp jatyrmyz, — deıdi oblystyq balyq ınspektsııasy basqarmasy basshysynyń mindetin atqarýshy Qonarbaı Bazarbaev.
Qonarbaı Bazarbaevtyń aıtýynsha, jaǵalaýda qustar da ólip jatyr. Sondyqtan oblystyq ekologııa departamentiniń mamandary teńizden sý synamasyn aldy.
Buǵan deıin, Kaspıı jaǵalaýynda 88 ıtbalyqtyń óleksesi tabylǵan edi.
Aqtaýda Kaspıı teńiziniń jaǵalaýynan qustardyń da óleksesi tabylǵanyn jazǵan bolatynbyz.