Mańǵystaýda adam papılomasy vırýsyna qarsy ekpeni 153 jasópirim qyz saldyrdy
AQTAÝ. KAZINFORM – Aımaqta egý sharalary 30-qyrkúıekten bastap barlyq mektepterde júrgizilip jatyr. Búginde 153 qyz balaǵa vaktsına salyndy. Onyń 92-si 11 jasta, 32-si 12 jasta, 29-y 13 jastaǵy qyzdar. Ekpe jasóspirimderdiń ata-analarynyń kelisimimen salynǵan. Mamandardyń aıtýynsha, vaktsınadan keıin jasóspirimderdiń jaǵdaıy jaqsy.
— Biz búgin 6-synypta oqıtyn qyzyma ekpe saldyrýǵa keldik. Bul vaktsına «jatyr moıny obyrynyń» jáne basqa da adam papılomasy vırýsy arqyly paıda bolatyn qaterli dertterdiń aldyn-alýǵa kómektesedi. Meniń oıymsha, aldyn alý sharasyn júrgizgen durys. Biz balalarymyzdyń densaýlyǵyn jastaıynan oılaýymyz qajet, — deıdi ata-analardyń biri Janel Rysqalıeva.
Mamandardyń málimetinshe, qazaqstanda jyl saıyn jatyr moıny obyrynyń 1900-ge jýyq jańa jaǵdaılary tirkelip otyr. Bir jylda 600-den astam áıel osy aýrýdan kóz jumady. Elimizde jatyr moıny obyry barlyq jastaǵy áıelder arasyndaǵy sút beziniń obyrynan keıingi keń taralǵan qaterli aýrý.
— Adam papıllomasy vırýsy — teriniń jáne deneniń ár túrli bólikteriniń shyryshty qabyqtaryn zaqymdaıtyn vırýstar toby. Onyń keı túrleri emdelmegen jaǵdaıda 10-15 jylda jatyr moıny isigine ákeledi, - deıdi Mańǵystaý oblysynyń sanıtarııalyq-epıdemıologııalyq baqylaý departamenti, ınfektsııalyq jáne parazıtarlyq aýrýlardy epıdemıologııalyq qadaǵalaý bóliminiń basshysy Gýlshat Shorbasova.
Buǵan deıin, Aqtaýdyń irgesinde kartaǵa kirmegen aty joq aýyl baryn jazǵan bolatynbyz.
