Mańǵystaýda adam óltirgen prokýror túrmege qamalmaı, shartty jaza aldy

AQTAÝ. KAZINFORM - Mańǵystaý oblysynda Munaıly aýdany prokýrorynyń burynǵy orynbasary Aqtaý qalasy boıynsha memlekettik kirister basqarmasy basshysynyń orynbasaryn óltirgeni úshin bir jarym jylǵa bas bostandyǵy shekteldi.

Oblystyq sottyń habarlaýynsha, prokýrordyń orynbasary jábirlenýshiniń densaýlyǵyna qasaqana aýyr zııan keltirip, abaısyzda ólimge ákep soqqany úshin Qylmystyq kodekstiń 106-babynyń 3-bóligimen aıyptalǵan.

Al sotpen anyqtalǵan jaǵdaı boıynsha 2023 jyldyń jeltoqsan aıynda aýdan prokýrorynyń burynǵy orynbasary jábirlenýshi memlekettik kirister basqarmasy basshysynyń orynbasarymen janjaldasyp sońy qaıǵyly oqıǵaǵa ulasty. 

Tóbeles kezinde marqum aýyr dene jaraqatyn alǵan. Sonyń saldarynan ol jerge qulap, esin jımastan qaıtys boldy.

«Sottalýshynyń kinási jábirlenýshiniń ókili men kýágerlerdiń jaýabymen, sot saraptamasynyń qorytyndysymen jáne istiń basqa materıaldarymen tolyq dáleldendi. Jaryssóz barysynda memlekettik aıyptaýshy aıypty ózgertip, sottalýshyny qylmystyq kodekstiń 104-babynyń 1-bóliginde kózdelgen qylmysty jasaǵany úshin kináli dep tanýdy surady. Іs ózgertilgen aıyp boıynsha qaraldy. Sot jaza taǵaıyndaý kezinde jaýapkershilik pen jazany jeńildetetin mán-jaı retinde sottalýshynyń óz kinásin moıyndaýyn, shyn ókinetinin, asyraýynda úsh jas balanyń, onyń bireýiniń úshinshi toptaǵy múgedek ekenin eskerdi. Aýyrlatatyn mán-jaı anyqtalǵan joq. Sot sheshimimen aýdan prokýrorynyń burynǵy orynbasaryna ózgertilgen aıyp boıynsha Qylmystyq kodekstiń 104-babynyń 1-bóligimen, ıaǵnı, abaısyzda qazaǵa ushyratqany úshin kináli dep tanylyp, 1 jyl 6 aıǵa bas bostandyǵynan shekteý jazasy taǵaıyndaldy» dep jazylǵan Mańǵystaý oblysy taratqan habarlamada.

Qazirgi ýaqytta sot úkimi zańdy túrde kúshine engen joq.

Bul is apellıatsııalyq sot alqasynyń qaraýyna berilgeni málim bolyp otyr. 

Marqumnyń artynda áıeli men eki balasy qaldy.