Mańǵystaýda 83 keliden astam marıhýana tárkilendi
AQTAÝ. KAZINFORM — Mańǵystaý oblysynda 83 keliden astam marıhýanany zańsyz saqtaǵan kúdikti ustaldy.
Oqıǵa Munaıly aýdanynyń Atameken aýylynda bolǵan. «Qarasora» jedel-profılaktıkalyq is-sharasy aıasynda polıtsııa qyzmetkerleri oblys prokýratýrasynyń úılestirýimen jedel-tergeý jumystaryn júrgizgen.
— 6 tamyz kúni saǵat 22:00 shamasynda túsken jedel aqparat negizinde aýyldaǵy sharýashylyq nysandarynyń birine tintý júrgizildi.
Nátıjesinde ósimdik tektes zat — marıhýana salynǵan bes qap tárkilendi. Esirtkiniń jalpy salmaǵy 83 keli 300 gramm boldy, — delingen habarlamada.
Atalǵan derek boıynsha QR Qylmystyq kodeksiniń 296-baby 2-bóligimen qylmystyq is qozǵaldy. 27 jastaǵy kúdikti ustalyp, ýaqytsha ustaý ızolıatoryna qamaldy. Qazirgi ýaqytta tergeý amaldary jalǵasyp jatyr.
Buǵan deıin, Mańǵystaýda ken ornynda munaıdy zańsyz óndirý týraly aqparat tekserilip jatyr.
