Mańǵystaýda 62 kg marıhýana, qarý-jaraq pen 32 mln teńge tárkilendi
AQTAÝ. KAZINFORM — Mańǵystaý oblysynda «Búrkit» arnaıy jasaǵy asa kóp mólsherde esirtki zattary men 8 dana atys qarýyn tárkiledi. Bul týraly oblystyq polıtsııa departamenti habarlady.
Esirtki qylmystaryna qarsy is-qımyl basqarmasynyń qyzmetkerleri «Quqyqtyq tártip» jáne «Qarasora–2025» jedel-profılaktıkalyq is — sharalary aıasynda, «Búrkit» arnaıy jasaǵynyń sarbazdarymen jáne «Kıra» atty qyzmettik ıttiń kómegimen jedel-izdestirý is-sharalaryn jáne tintý jumystaryn júrgizgen.
Nátıjesinde, Munaıly aýdanynyń «Ońtústik» baý-baqsha seriktestiginde № 52 jáne № 54 jer ýchaskelerinen asa iri kólemde esirtki zattaryn zańsyz saqtady degen kúdikpen birneshe azamat ustaldy.
— Tintý barysynda garajdan jáne kólikterden Hatsan, Kruger, RAR markaly vıntovkalar, Stalker tapanshasy — barlyǵy 8 dana qarý jáne 12 jáshik oq-dári. 3 dana metadon tabletkasy. 3 dana Motorola radıostantsııasy, 2 dron, 2 beınebaqylaý kamerasy. Sýyq qarý jáne arbalet. Sonymen qatar, 32 596 000 teńge. Garajdan 9 jáshikke qara ızolentaǵa oralǵan jalpy salmaǵy — 62 kılogrammnan asatyn 136 paket marıhýana tabyldy, — delingen habarlamada.
Atalǵan derek boıynsha QR Qylmystyq kodeksiniń 296-baby 2-bóligi (esirtki zattaryn zańsyz daıyndaý, óńdeý, satyp alý, saqtaý, tasymaldaý — satý maqsatynsyz) boıynsha sotqa deıingi tergeý bastaldy. Keıin is 297-baptyń 3-bóligine (asa iri mólsherde esirtkini ótkizý maqsatynda saqtaý) qaıta saralandy.
Qazirgi ýaqytta qajetti jedel-tergeý áreketteri júrgizilip jatyr.
Buǵan deıin, Almatyda bıyl jarty tonnadan astam esirtki tárkilengeni týrady jazǵan bolatynbyz.