Mańǵystaýda 6 myńǵa jýyq volonter áleýmettik jobalarǵa atsalysyp júr
ASTANA. KAZINFORM – Mańǵystaý oblysynda jyl basynan beri volonterlerdiń qatysýymen 300-den astam áleýmettik mańyzy bar is-shara ótkizildi.
Qazaqstanda Memleket basshysy Qasym-Jomart Toqaevtyń bastamasymen jarııalanǵan BUU-nyń turaqty damý maqsatyndaǵy Halyqaralyq volonterler jyly aıasyndaǵy jumystar jalǵasyp jatyr.
Búginde óńirde 6 myńǵa jýyq volonter 6 volonterlik uıym men 10 eriktiler tobynyń quramynda qoǵamdyq jumystarǵa belsendi qatysyp keledi.
– Volonterler qaıyrymdylyq, ekologııa, bilim berý jáne áleýmettik baǵyttaǵy jobalarǵa atsalysyp, qoǵamnyń túrli sanatyndaǵy azamattarǵa qoldaý kórsetedi, – delingen habarlamada.
Óńirde júzege asyrylyp jatqan jobalardyń biri – «Batyl bol» bastamasy. Onyń aıasynda volonterler turǵyndarǵa qazaq tilin tegin úıretedi. Sabaq barysynda til úıretýmen qatar, qazaq halqynyń tarıhy, mádenıeti men salt-dástúrine erekshe nazar aýdarylady. Qazir kýrsqa 80-ge jýyq adam qatysyp júr.
Sonymen qatar jastardyń medıasaýatyn arttyrýǵa baǵyttalǵan «Jas Media» jobasy júzege asyrylyp jatyr. Qatysýshylar foto jáne beınetúsirilim, SMM, grafıkalyq dızaın, mobılografııa jáne áleýmettik jelige arnalǵan kontent ázirleý boıynsha bilim alady.
Taǵy bir mańyzdy bastama – «Meıirim mekeni» qaıyrymdylyq aktsııasy.
Onyń aıasynda eriktiler kópbalaly jáne az qamtylǵan otbasylarǵa, jalǵyzbasty qarttarǵa jáne erekshe qajettiligi bar azamattarǵa kómek kórsetedi.
Volonterler azyq-túlik pen kúndelikti turmysqa qajetti zattardy jetkizip, óńirdegi qoǵamdyq belsendiliktiń artýyna úles qosyp keledi.
Aıta keteıik, Balqashta Halyqaralyq volonterler forýmy ótti.
