Mańǵystaýda 6 qurylys kompanııasy lıtsenzııasynan aıyryldy

AQTAÝ. KAZINFORM – Mańǵystaý oblysynda qurylys talaptaryn óreskel buzǵan kompanııalar sot sheshimimen qurylys-montaj jumystarynan shettetildi.

Aımaqta byltyrdan beri qurylys salasy qatań baqylaýǵa alyndy. Quzyrly memlekettik organ tekserýler júrgizip, kóptegen zańbuzýshylyqty anyqtaǵan. Sotqa 35 talap-aryz berip, sonyń 33-i qanaǵattandyryldy. Nátıjesinde 5 ǵımarat súrildi. Qalǵan nysandar da sot sheshimimen buzýǵa jiberilgen.

Sondaı-aq, 6 qurylys kompanııasy qurylys-montaj jumystaryn júrgizý lıtsenzııasynan aırylyp, taǵy 5 mekeme lıtsenzııasynan óz erkimen bas tartqan.

– Bul kompanııalar qurylys normalaryn óreskel buzdy. Bizdiń taraptan birneshe ret berilgen eskertýdi de elemedi. Sondyqtan qujattar sotqa tapsyrylǵan bolatyn. Tekserýler kezinde odan bólek, tehnıkalyq qadaǵalaýshy mekemelerge qatysty da zańbuzýshylyqtar anyqtaldy. Mysaly,1 akkredıttelgen tehnıkalyq qadaǵalaýshy mekemeniń akkredıtatsııasynyń kúshi joıylyp, 2 tehnıkalyq qadaǵalaýshy sarapshynyń attestaty 6 aıǵa toqtatyldy. Jalpy somasy 124 958 500 teńgeni quraıtyn 400 ge jýyq ákimshilik hattama toltyryldy, - dedi Mańǵystaý oblysy boıynsha memlekettik sáýlet-qurylys baqylaý basqarmasynyń basshysy Dáýren Ótepqalı.

Byltyr Aqtaýda zańsyz salyna bastaǵan 5 qurylys súrilgen bolatyn. Onyń biri – qonaq úı, qalǵany – turǵyn úı keshenderi. Mamandar qadaǵalaýdy odan ári kúsheıtpek. Sondyqtan qajetti qujattary joq nemese qala qurylysy jáne qurylys normalary men erejelerin buza otyryp salynǵan obektilerdi tekserý jalǵasady.