Mańǵystaýda 560 joba sýbsıdııa alyp, óńir alǵashqy orynǵa kóterildi

Senatorlar Mańǵystaý oblysyndaǵy shaǵyn jáne orta bıznesti damytý máselelerin talqylady, dep habarlaıdy QazAqparat Senattyń baspasóz qyzmetine silteme jasap. 

Depýtattar ekonomıkalyq saıasat, ınnovatsııalyq damý jáne kásipkerlik komıtetiniń kóshpeli otyrysyn Mańǵystaý oblysynda ótkizdi.

Shaǵyn jáne orta kásipkerlikti damytý máseleleri kezdesýdiń basty taqyryby boldy.

Komıtet tóraǵasy Súıindik Aldashev otyrysty asha kelip, «Ádiletti Qazaqstannyń ekonomıkalyq baǵdary» Qazaqstan halqyna Joldaýyn iske asyrý aıasynda memleket kásipkerlerge ekonomıkaǵa ınvestıtsııa salýǵa, salyqty adal tóleýge, jumys oryndaryn ashýǵa múmkindik beretin bıznesti damytý úshin neǵurlym qolaıly jaǵdaı jasaýdy kózdep otyrǵanyn atap ótti.

Ol sondaı-aq komıtet aǵymdaǵy jyldyń qarasha aıynda shaǵyn jáne orta kásipkerlikti damytý taqyrybynda úkimettik saǵat ótkizýdi josparlaǵanyn jetkizdi.

«Búgin otyrysta ortalyq jáne jergilikti atqarýshy organdarmen birlese otyryp Mańǵystaý oblysyndaǵy shaǵyn jáne orta bıznestiń júıeli máseleleri qaraldy. Óz kezeginde, bıznes ókilderi tarapynan naqty máseleler men usynystar aıtylady. Olardy komıtettiń budan bylaıǵy zańnamalyq jumysynda qarastyrý jáne eskerý qajet dep sanaımyn. Qajet bolǵan jaǵdaıda ortalyq memlekettik organdarmen birlesip zańnamaǵa tıisti túzetýler daıyndaý qajet», - dedi senator Aldashev.

«Atameken» óńirlik kásipkerler palatasynyń ókili óz kezeginde parlamentshilerge óńirdegi ahýal týraly aıtyp berdi.

Máselen, Mańǵystaý oblysy 7 aıda sýbsıdııaǵa qoldaý alǵan jobalar boıynsha 1-oryndy (560 joba) jáne kredıtteý somasy boıynsha 5-oryndy (23 mlrd teńge) ıelengeni habarlandy. 

Otyrys barysynda «Damý» qorynyń, Agrarlyq nesıe korporatsııasynyń, «Kaspıı» ÁKK ókilderi de shaǵyn jáne orta kásipkerlikti damytý týraly sóz sóıledi.

Depýtattar sonymen qatar «Aqtaý teńiz porty» AEA, Aqtaý teńiz soltústik termınaly, «Sarja» kólik-logıstıkalyq ortalyǵy, Quryq porty jáne óńirdiń basqa da birqatar nysandaryn aralady.