Mańǵystaýda 460 bala tamaqtan ýlandy: Bir aı ishinde búkil mektepterdiń ashanasy tekseriledi

ASTANA. KAZINFORM — Premer-Mınıstr Oljas Bektenov Munaıly aýdanynynyń Besshoqy aýylynda balalardyń ýlanýyna baılanysty densaýlyq saqtaý, oqý-aǵartý mınıstrlerin, Mańǵystaý oblysy ákiminiń esebin tyńdady.

Búgingi tańda 460 bala dárigerlerdiń baqylaýynda, onyń 83-i aýrýhanaǵa jatqyzyldy, 2 bala jansaqtaý bóliminde. Zardap shekkenderdiń barlyǵy, onyń ishinde jansaqtaý bólimindegi balalardyń jaǵdaıy birqalypty.

Densaýlyǵynyń jaqsarýyna baılanysty reanımatsııada jatqan eki bala jalpy bólimshege aýystyryldy. 

Qazirgi ýaqytta aýrýhanaǵa ýlaný belgilerimen túsken balalardyń barlyǵyna tolyq kólemde qajetti medıtsınalyq kómek, sonyń ishinde psıhologııalyq kómek kórsetilýde. Oqıǵa ornynda QR Oqý-aǵartý mınıstrligi bala quqyqtaryn qorǵaý komıtetiniń ókilderi jumys istep jatyr.

Zardap shekkenderge jáne olardyń otbasylaryna qoldaý sharalaryn kórsetý boıynsha jumystar júrgizilýde. Táýlik boıy shtab jumys isteıdi. 

Aýrý oshaǵyn oqshaýlaý jáne joıý sharalaryn kúsheıtý úshin óńirge «Qoǵamdyq densaýlyq saqtaý ulttyq ortalyǵy» ShJQ RMK «Sanıtarııalyq-epıdemıologııalyq saraptama jáne monıtorıng ǵylymı-praktıkalyq ortalyǵy» fılıalynyń mamandary jiberildi. 

Úkimet basshysynyń tapsyrmasy boıynsha bir aı ishinde respýblıkadaǵy barlyq mektepterdiń ashanalarynda sanıtarııalyq-epıdemıologııalyq talaptardyń saqtalýyna monıtorıng júrgiziledi.

Ol mekteptegi tamaqtanýdyń qaýipsizdigin qamtamasyz etý jáne mundaı jaǵdaılardyń qaıtalanýyna jol bermeý sharalaryn kúsheıtýge baǵyttalǵan. 

№ 8 mektepte tergeý jumystary júrgizilip jatyr. Kináliler jaýapqa tartylady. 

Eske salaıyq, 7 qyrkúıek kúni Munaıly aýdanynyń emhanasyna astan ýlanǵan 141 bala kómekke júgingen bolatyn. 

Ýlanǵan oqýshylardyń ishinde 67 bala aýrýhanaǵa jatqyzyldy. 

Keıinnen as ishken soń jaǵdaıy nasharlaǵan oqýshylardyń sany 222-ge jetti.