Mańǵystaýda 40 mıllıon jyldyq akýlanyń tisteri tabyldy
AQTAÝ. KAZINFORM — Mańǵystaýǵa ekspedıtsııaǵa kelgen Shvetsııa eliniń ǵalymy, paleontolog Shtefan Kıl men Esenov ýnıversıtetiniń stýdentteri jáne «Geologııa jáne munaı-hımııalyq ınjınırıng» kafedrasynyń meńgerýshisi Sezim Mustapaeva oblys aýmaǵynda birlesken ǵylymı-zertteý jumystaryn júrgizgen.
Nátıjesinde akýlanyń tisterin tapty. Ǵalymdardyń aıtýynsha, tabylǵan tister osydan 30 — 40 mıllıon jyl buryn ómir súrgen iri jyrtqysh balyqqa tıesili bolýy múmkin.
Zertteý barysynda kıttiń qabyrǵasy, teńiz juldyzynyń qaldyqtary men túrli mollıýskalar da tabylǵan. Ǵalymdardyń pikirinshe, bular ejelgi muhıt ekojúıesiniń izderi.
Zertteýshilerdiń aıtýynsha, erte zamanda Mańǵystaý aýmaǵy alyp Tetıs muhıtynyń bir bóligi bolǵan. Búginde shóleıtti aımaq sanalatyn óńirdiń tereńinde mıllıon jyldyq teńiz tarıhy jatyr.
— Bul biregeı paleontologııalyq olja — mıllıondaǵan jyl buryn qazirgi Mańǵystaý aýmaǵyn alyp jatqan kóne Tetıs muhıtynyń tabıǵı tarıhynan syr shertetin asa qundy ǵylymı jańalyq. Tabylǵan akýla tisteri óńirdiń geologııalyq ótkeni men ejelgi teńiz ekojúıesiniń baılyǵyn dáleldeı otyryp, halyqaralyq ǵylymı qaýymdastyq úshin de erekshe mańyzǵa ıe bolyp otyr, — deıdi Shvetsııa ǵalymy Shtefan Kıl.
Buǵan deıin, Mańǵystaýda Rım dáýirimen baılanysty kóne qala tabylǵan.
