Mańǵystaýda 4 eldi-mekende ınternet joq

AQTAÝ. KAZINFORM – Aımaqta 59 aýyldyq eldi meken bar. Onyń ishinde halyq sany 250 adamnan asatyn 48 aýyl, 250 adamnan kem 11 aýyl bar.

Búgingi tańda 55 eldi-meken ınternetpen qamtamasyz etilgen.

— Tek halqynyń sany 250 adamnan az, shalǵaıda ornalasqan 4 eldi-meken mobıldi ınternetpen qamtylmaǵan. Olar Mańǵystaý aýdanynyń Jarma, Sazdy jáne Basqudyq aýyldary men Qaraqııa aýdanynyń Aqqudyq aýyly, — dep habarlaıdy oblystyq ishki saıasat basqarmasy.

Atalǵan 4 aýyldyq eldi-mekendi «Qoljetimdi ınternet» ulttyq jobasy aıasynda talshyqty-optıkalyq baılanys jelilerin salý arqyly ınternetpen qamtamasyz etý josparlanǵan.
Ulttyq joba aıasynda 6 aýyldyq eldi-mekendi mobıldi ınternetpen qamtýǵa múmkindik bar. Olar Mańǵystaý aýdanynyń Jarma, Sazdy, Basqudyq jáne Tıgen aýyldary, Qaraqııa aýdanynyń Aqqudyq aýyly, Beıneý aýdanynyń Noǵaıty aýyly. Usynystar Qazaqstan Respýblıkasynyń Tsıfrlyq damý, ınnovatsııalar jáne aeroǵarysh ónerkásibi mınıstrligine joldanǵan.

— Sonymen qatar, bıyl oblystaǵy Aqqudyq, Bostan jáne Beki aýyldyq eldi-mekenderinde ornalasqan 3 mektep talshyqty optıkalyq baılanys jelisiniń qurylysyna deıin, «Starlink» spýtnıktik ınternetimen qamtamasyz etildi, — delingen habarlamada.

Jalpy oblysta 2027 jylǵa deıin respýblıkalyq jáne oblystyq mańyzdaǵy avtojoldardy sapaly uıaly baılanyspen jáne ınternetpen qamtý kózdelgen.