Mańǵystaýda 3,5 myń jumys orny ashylatyn avıatsııalyq hab qurylady
ASTANA. KAZINFORM – QR Premer-mınıstriniń birinshi orynbasary Nurlybek Nálibaev Mańǵystaý oblysyna jumys sapary barysynda óńirdegi óndiristik, energetıkalyq, kólik-logıstıkalyq jáne týrıstik nysandardyń jumysymen tanysty, dep habarlaıdy Úkimettiń baspasóz qyzmeti.
Memleket basshysy Qasym-Jomart Toqaevtyń áýe habtaryn belsendi damytý jáne olardy jahandyq logıstıka tizbegine kiriktirý jónindegi tapsyrmalaryn oryndaý aıasynda Úkimet áýejaı ınfraqurylymy men ishki tasymaldardy damytý boıynsha keshendi jumys júrgizip jatyr.
Aqtaý halyqaralyq áýejaıynda birinshi vıtse-premerge áýejaı bazasynda mýltımodaldy logıstıkalyq jáne avıatsııalyq hab qurý jobasy tanystyryldy. Keshende áýe kemelerine tehnıkalyq qyzmet kórsetý jáne jóndeý, áýe júkterin tasymaldaý, mamandar daıarlaý jáne logıstıkalyq qyzmetterdi bir alańǵa shoǵyrlandyrý kózdelgen. Joba iske asqannan keıin 3,5 myń turaqty jumys orny ashylady.
Nurlybek Nálibaev «Kendirli» áýejaıynyń qurylys barysyn da tekserdi. Qazir qurylys-montajdaý jumystarynyń jalpy oryndalý deńgeıi 49%-ǵa jetken.
– Áýejaıdyń ushý-qoný jolaǵynyń uzyndyǵy 2 200 metr, eni 35 metr bolady. Jolaýshylar termınaly saǵatyna 150 adamǵa deıin qyzmet kórsetýge eseptelgen. Qazir ushý-qoný jolaǵy, perron, rýldeý joly, perımetrlik qorshaý men kirme jol, sondaı-aq jolaýshylar termınaly jáne ınjenerlik ınfraqurylym nysandary salynyp jatyr. Áýejaıdy bıylǵy jyldyń sońynda paıdalanýǵa berý josparlanǵan, – delingen Úkimet aqparatynda.
Jańaózen qalasynda birinshi vıtse-premer salynyp jatqan jańa gaz óńdeý zaýytynyń qurylysymen tanysty. Strategııalyq nysan jylyna 900 mln tekshe metr tabıǵı jáne ilespe gazdy óńdeýge qaýqarly bolady. Zaýytty 2027 jyly iske qosý josparlanyp otyr.
Aqtaýda salynyp jatqan «Nur» sanatorlyq-saýyqtyrý kesheniniń jobasy da tanystyryldy. Onyń basty ereksheligi – jerasty tabıǵı termaldy sý kózin emdik-saýyqtyrý maqsatynda paıdalaný.
Keshende 175 nómiri jáne 320 tósek-orny bar sanatorıı salynady. Munda ońaltý bólimsheleri jumys istep, fızıoterapııa, massaj, balshyqpen emdeý jáne ıngalıatsııa qyzmetteri kórsetiledi. Budan bólek, jabyq basseın, saýna, hamam, eki ashana jáne 120 oryndyq konferents-zal qarastyrylǵan. Qurylys 2026 jyldyń IV toqsanynda aıaqtalyp, keshen tolyq iske qosylǵannan keıin 100 turaqty jumys orny ashylady.
Sapar barysynda kólik-logıstıkalyq ınfraqurylymdy damytý máselelerine de nazar aýdaryldy. Nurlybek Nálibaev Aqtaý teńiz saýda porty, Quryq porty jáne Aqtaý halyqaralyq konteınerlik habynyń qyzmetimen tanysty.
Aqtaý portynyń jyldyq óndiristik qýaty 11,8 mln tonna bolsa, Quryq portynyń ótkizý qabileti – 6 mln tonna. Aqtaý halyqaralyq konteınerlik habynyń jobalyq qýaty jylyna 240 myń jıyrma fýttyq ekvıvalent konteınerge jetedi. Habtyń birinshi kezeńi 2026 jylǵy naýryzda paıdalanýǵa berilgen.
Bul nysandardy damytý Kaspıı teńizi arqyly júk tasymalyn ulǵaıtyp, Qazaqstannyń Transkaspıı halyqaralyq kólik baǵyty boıynsha tranzıttik áleýetin arttyrýǵa baǵyttalǵan.
Sonymen qatar óńirdiń hımııa ónerkásibin damytý máseleleri qaraldy. Birinshi vıtse-premer «QazAzot» AQ-nyń óndiristik qyzmeti jáne kásiporyndy odan ári damytý josparymen tanysty. Sondaı-aq Aqtaý qalasynda ammıak-karbamıd keshenin salý jobasy qarastyryldy.
Nurlybek Nálibaev óńirdiń energetıkalyq qaýipsizdigin qamtamasyz etý jumystaryn, sonyń ishinde «MAEK» JShS qyzmeti men aldaǵy jylytý maýsymyna daıyndyq barysyn tekserdi.
Aqtaý qalasynda salynyp jatqan qýaty 160 MVt bý-gaz qondyrǵysynyń qurylys-montajdaý jumystary 71,8%-ǵa oryndalǵan. Nysandy 2027 jyldyń ekinshi toqsanynda paıdalanýǵa berý josparlanyp otyr.
Aıta keteıik, Mańǵystaýda 536 km elektr jelisine kúrdeli jóndeý tolyq aıaqtaldy.
